Մաքսային միությանը Հայաստանի անդամակցելու գործընթացն իրականացնելու համար ՀՀ ֆինանսների նախարարությունում ստեղծվել են երեք աշխատանքային խմբեր, որոնց միջոցով աշխատում են գործընկեր երկրների հետ:
Այս մասին «Հայաստան-Մաքսային միություն. Հնարավորություններ ու մարտահրավերներ» թեմայով ՀՀ երկրորդ տնտեսական համաժողովին ասաց ՀՀ ֆինանսների նախարար Դավիթ Սարգսյանը և նշեց, որ այս գործընթացում առաջնային խնդիրներից է մաքսային օրենսդրությունների մոտարկումը ՀՀ-ի և ՄՄ անդամ երկրների միջև:
«Մաքսային համակարգի հետ կապված փոփոխություններից մեկը մաքսային ձևակերպումներն են: Մենք պարտավոր ենք մաքսազերծման հետ կապված բոլոր աշխատանքները իրականացնել մեկ պատուհան սկզբունքով, ինչպես նաև պետք է անցնենք ամբողջությամբ հայտարարգրերը էլեկտրոնային համակարգով ներկայացնելու սկզբունքին»,-ասաց նա:
Ըստ նախարարի՝ մյուս կարևոր փոփոխությունը, որը պետք է իրականացվի՝ մաքսային մարմինների պաշտոնատար անձանց որոշումների գործողությունների բողոքարկումն է:
«Եթե այսօր կարելի է միայն որոշ դեպքերում ու որոշ մասնակիցների կողմից բողոքարկման հայտ ներայացնել ու բողոքարկել պաշտոնատար անձանց որոշումները, ապա ՄՄ-ի կանոններով ցանկացած շահագրգռված անձ կարող է դիմել բողոքարկման և բողոքարկել ցանկացած հարց»,-ասաց նա:
Դավիթ Սարգսյանը նաև նշեց, որ փոփոխվելու են մաքսազերծվող ապրանքի համար գանձվող գումարների ժամկետները:
«Ապրանքների ներմուծելիս այսօր 10 օրվա ընթացքում պետք է բոլոր պարտադիր վճարումները իրականացվեն, որից հետո միայն կարող են մաքսազերծվել ապրանքները: ՄՄ-ի օրենքներով կարելի է տարաժամկետել վճարումներ՝ կիրառելով բանկային երաշխիքներ կամ այլ միջոցներ»,- ասաց նա:
Ֆինանսների նախարարը նաև հիշեցրեց, որ ներկայումս ՀՀ-ի և ՄՄ-ի միջև ընթանում են բանակցություններ՝ նվազեցնելու երրորդ երկրներից Հայաստան ներմուծվող 900 անուն ապրանքների նկատմամբ մաքսազերծման տոկոսադրույքները։
