Հայրենական ապրանք արտադրողների միության նախագահ Վազգեն Սաֆարյանը համարում է, որ Մաքսային միությանը Հայաստանի անդամակցությամբ տեղական ավտոշուկան կշահի՝ չնաjած արտասահմանյան արտադրության մեքենաների թանկացման մտավախությանը:
«Մեքենաների թանկանալու մտավախությունը կա, տարեկան 35-40 հազար մեքենա ենք ներկրում, և Ռուսաստանը մեծ մաքսատուրքեր է դրել այդ ներկրումների վրա, քանի որ ուզում է իր արտադրանքն իրացնել»,- այսօր կայացած ասուլիսին ասաց նա՝ ընդգծելով, որ եթե մի տեղ կորցնում ես, մեկ ուրիշ տեղում շահում ես:
Իսկ թե ՄՄ-ին միանալու պայմաններում ինչ կշահի Հայաստանը, Վազգեն Սաֆարյանը նշեց, որ երկրում կսկսեն ներքին ռեսուրսները ռացիոնալ օգտագործել: «Դրա համար մենք պետք է մեր ներքին ռեսուրսները մոբիլիզացնենք, ճիշտ օգտագործենք և աշխատատեղեր ստեղծենք»,- ասաց նա:
Վերջինիս խոսքով՝ այսօր հիմնական խնդիրը Վանաձորի «Քիմպրոմն» է, որն անթույլատրելիորեն չի աշխատում: Սեփականատերերը ռուսներն են, և այնտեղ հնարավոր է նաև գործարան աշխատեցնել Ռուսաստանում գազի ներքին գներով:
«Վանաձորում կանգ առանք նաև «Վանաձոր-Ֆիալետովո» երկաթուղու տարածքում, դա Կառավարության կողմից դիտարկվել է որպես կարևոր կառույց, որը մեծ դեր ունի հայ-ռուսական հարաբերություններում, և այն պետք է շահագործվի»,- ասաց նա և ավելացրեց, որ կարևոր է նաև Ախուրյանի շաքարի գործարանի շահագործումը, որը նույնպես հիմա չի աշխատում:
Վազգեն Սաֆարյանը նաև տեղեկացրեց, որ այս տարի նախատեսվում է Թեղուտի հանքավայրի շահագործումը, և նախատեսված է 60 հազար տոննա խտանյութ արտահանել։
«Նախագահը հայտարարել էր, որ այնտեղ պետք է կառուցվի ձուլարան: Դրանով և բնությունը կմաքրվի ծանր մետաղներից, և հումք կարտադրվի: Մենք առաջարկել ենք նաև նման ձուլարան կառուցել Մեղրիում»,– ասաց նա:
Անդրադառնալով ներդրումներին՝ բանախոսը նկատեց, որ ՄՄ-ի անդամակցությամբ ներդրումների քաղաքականությունն ավելի նպաստավոր կլինի: