Ըստ ՀՀ Կենտրոնական բանկի կողմից հրապարակված տվյալների' գործարար միջավայրի ցուցանիշը (ԳՄՑ) 2014թ-ի առաջին եռամսյակում կազմել է 55.7, ինչը բարձր է կայունության միջակայքից՝ պահպանելով բոլոր ոլորտներում առկա լավատեսական տրամադրվածությունը: Ցուցանիշի հաշվարկն իրականացվում է պատասխանների փաստացի և սպասման արժեքների միջինացման միջոցով:
Գործարար միջավայրի փաստացի արժեքը հաշվարկվել է թողարկման ծավալների, ընկերության տնտեսական վիճակի, աշխատողների թվաքանակի ընթացիկ, իսկ սպասման արժեքը' գալիք եռամսյակում թողարկման ծավալների, ընկերության տնտեսական վիճակի, արտադրանքի կամ ծառայությունների նկատմամբ պահանջարկի և պաշարների վերաբերյալ կազմակերպությունների սպասումների սեզոնային հարթեցված պատասխանների հիման վրա: Ցուցանիշի հաշվարկման համար տրվող հարցերը ունեն պատասխանների հետևյալ տարբերակները. աճ, անփոփոխ մակարդակ, նվազում: Պատասխանների հիման վրա հաշվարկվում է յուրաքանչյուր տարբերակի տեսակարար կշիռը պատասխանների ընդհանուր քանակում, այնուհետև դրական պատասխանների տեսակարար կշռին գումարվում է չեզոք պատասխանների կշռի կեսը' ստանալով պատասխանների արժեքները:
Արժեքները տատանվում են 0- 100 միջակայքում: Որտեղ' 0 արժեքը խոսում է այն մասին, որ բոլոր հարցվածները նշել են նվազում, 100 արժեքը' աճ, իսկ 50 արժեքը' կայուն վիճակ' այսինքն' աճ և նվազում ակնկալող հարցվողների քանակը հավասար է: Որպես կայունության միջակայք ընդունել ենք արժեքի տատանումը 45-ից մինչև 55-ը: Գործարար միջավայրի ամենաբարձր ցուցանիշը գրանցվել է առևտրի ոլորտում (56.8), իսկ ամենացածր ցուցանիշը' շինարարության ոլորտում, ինչը, սակայն, գտնվում է կայունության միջակայքում: Արդյունաբերության և ծառայությունների ոլորտներում ևս արձանագրվել է աճի տեմպի արագացում և առաջին եռամսյակում ցուցանիշների արժեքները բարձր են կայունության միջակայքից:
