Reuters-ը հայտնում է, որ արագ սննդի «Մակդոնալդս» ռեստորանային ցանցը ժամանակավորապես Չինաստանում վաճառքից հանել է այն արտադրանքները, որոնց բաղադրության մեջ մտնում է տավարի, խոզի և թռչնի միս:
Որոշ ճաշատեսակների վաճառքի կասեցումը պայմանավորված է արագ սննդի ցանցի մատակարար Shanghai Husi Food ընկերության հետ կապված սկանդալով: Husi-ն մեղադրվել էր ժամկետանց ապրանքների վաճառքի մեջ: Bloomberg գործակալության տվյալներով, բացի մսային ճաշատեսակներից, սահմանափակվել է նաև աղցանների և սառույցով կանաչ թեյի վաճառքը:
Չինաստանում «Մակդոնալդս»-ի ներկայացուցիչը հայտնել է, որ հուլիսի 25-ին դադարեցվել է Husi ընկերության ապրանքների սպառումը: Չինաստանի բոլոր ռեստորանները կրճատել են իրենց մենյուն: Ավելի վաղ ամերիկյան OSI Group կազմակերպությունը, որի կազմի մեջ է մտնում Shanghai Husi Food-ը, հայտարարել էր, որ չինական շուկայից դուրս է բերում իր ողջ արտադրանքը և սեփական հետաքննությունն է սկսում:
Շանհայի ապրանքների և դեղամիջոցների որակի նկատմամբ վերահսկողության ազգային գործակալությունը մեղադրել էր Shanghai Husi Food-ին արագ սննդի ռեստորաններ ժամկետանց միս մատակարարելու համար: Հուլիսի 23-ին Շանհայում հինգ մարդ է ձերբակալվել Shanghai Husi Food-ի գործունեության հետաքննության հետ կապված:
Հուլիսի 28-ին «Ռոսսելխոզնադզորը» հայտնեց, որ հոլանդական Campina ընկերության Բելգիայում գտնվող գործարանը հայտնվել է վտանգավոր կաթնամթերք մատակարարողների ցուցակում՝ վերջինիս արտադրանքում քլորամֆենիկոլ հակաբորբոքային է հայտնաբերվել: Այս ընկերությունը կաթնամթերք է մատակարարում Ռուսաստանի «Մակդոնալդս» -ին:
Ավելի վաղ՝ հուլիսի 25-ին «Ռոսպոտրեբնադզորը» կասկածներ էր հայտնել «Մակդոնալդս»-ի Ռուսաստանում գործող ցանցի կողմից պատրաստվող սննդի անվտանգության հետ կապված: 2014թ-ի հունիսի ընթացիկ ստուգումների արդյունքում հայտնաբերվել են նաև օրենսդրական խախտումներ. Մասնավորապես՝ «Ցեզար-Ռոլում» և աղցաններում հայտնաբերվել է աղիքային ցուպիկ խմբին պատկանող բակտերիաներով աղտոտվածություն: Արտադրանքի էներգետիկ և սննդային արժեքը նույնպես չի համապատասխանել սպառողներին տրամադրվող տեղեկատվությանը:
«Ռոսպոտրեբնադզորը»-ը «Մակդոնալդս»-ի դեմ հայց է ներկայացրել դատարան: Նախնական լսումը կկայանա 2014թ.-ի օգոստոսին:
