Այս տարվա առաջին եռամսյակում Հայաստանի տնտեսական աճի տեմպը եղել է Կենտրոնական բանկի կանխատեսումից փոքր: Ինչպես Analitik.am-ը տեղեկանում է ՀՀ ազգային վիճակագրական ծառայությունից, 2014 թվականի հունվար-մարտին Հայաստանի ՀՆԱ ծավալը կազմել է մոտ 750,4 մլրդ դրամ, իսկ աճը՝ 3,1%: Այս ցուցանիշը ավելի քան կրկնակի փոքր է 2013-ի նույն ժամանակահատվածի ցուցանիշից, որը 7,5% էր: Իսկ Կենտրոնական բանկն այս տարվա առաջին եռամսյակի համար կանխատեսել էր 3,2-3,5% աճ։
Ստացվում է, որ այս տարի ՀՀ տնտեսական աճի տեմպը կրկնակի դանդաղել է: Ավելին, վերջին 5 տարիների առաջին եռամսյակների տվյալներով՝ ՀՀ տնտեսական աճն ունեցել է հետևյալ պատկերը.
Այսինքն՝ 2011 թվականից հետո, 2014-ի թվականի առաջին եռամսյակի տնտեսական աճի ցուցանիշն ամենացածրն է:
Ո՞ր ճյուղերն են «մեղավոր»
2014-ի առաջին եռամսյակում Հայաստանի մի շարք տնտեսություններում անկում է արձանագրվել: Դրանով է պայմանավորված տնտեսական աճի տեմպի թուլացումը:
Մասնավորապես, էլեկտրականության, գազի, գոլորշու և լավորակ օդի մատակարարման ոլորտում արձանագրվել է 11,4% անկում:
Հաջորդը շինարարության ոլորտն է, որտեղ արձանագրվել է 3,3% անկում:
Մյուսը հանքագործական արդյունաբերություն և բացահանքերի շահագործման ոլորտն է, անկումը՝ 1,3%:
0,1%-ով անկում է ապրել արտադրանքի հարկերի ոլորտը (հանած սուբսիդիաներ):
Ինչի՞ հաշվին է աճ գրանցվել
Այս տարվա առաջին եռամսյակում Հայաստանի տնտեսության մի քանի ճյուղերում գրանցվել է աճ, որն էլ նպաստել է 3,1% տնտեսական աճի ձևավորմանը: Մասնավորապես, հիմնականում նպաստել են.
17,5% արձանագրված աճը անշարժ գույքի ոլորտում
6,2%՝ գյուղատնտեսության
4,5%՝ մշակող արդյունաբերության
2.8%՝ մեծածախ և մանրածախ առևտրի
Ի՞նչ է կանխատեսվում
Ըստ ՀՀ Կենտրոնական բանկի՝ 2014 թ. համար Հայաստանի տնտեսական աճը գնահատվում է 4,1-4,8%: Արդյունաբերության ճյուղում ակնկալվում է ավելացված արժեքի շուրջ 3,7-5,2% աճ, իսկ շինարարության ոլորտում՝ 2,5-4,5%:
Զարգացման եվրասիական բանկի (ԶԵԱԲ) վերջին կանխատեսման համաձայն` Հայաստանում ՀՆԱ աճը 2014 թվականին կկազմի 4.8 %:
Արժույթի միջազգային հիմնադրամը (ԱՄՀ) կանխատեսում է 4.3 % չափով աճ:
Համաշխարհային բանկը (ՀԲ)` 5 %։
Իսկ Moody’s միջազգային գործակալությունը կանխատեսել է, որ 2014 թվականին Հայաստանի տնտեսական աճն ավելի ցածր կլինի, քան 2013-ինը: Գործակալությունը դա կապում է Հայաստանի՝ Ուկրաինայի ճգնաժամի և դրանում Ռուսաստանի ներգրավվածության հետ։
Հիշեցնենք, որ Հայաստանի ՀՆԱ–ն 2013 թվականին կազմել է 4 272.9 մլրդ դրամ կամ 10.4 մլրդ դոլար, իսկ տնտեսական աճը` 3.5 տոկոս։
Հավելենք, որ այս տարվա առաջին եռամսյակում Հայաստանի բնակչության մեկ շնչին բաժին ընկած ՀՆԱ ծավալը կազմել է 248 հազ. 876 դրամ ($605 կամ 442 եվրո)։