«Փոքր ձեռներեցությամբ զբաղվողների հայկական միության» նախագահ Ստեփան Ասլանյանը լրագրողների հետ հանդիպման ընթացքում տեղեկացրեց, որ իրենք երկուշաբթի օրը կրկին հավաքվելու են իրենց բողոքի ձայնը բարձրացնելու «Շրջանառության հարկի մասին» օրենքի վերաբերյալ:
Ստեփան Ասլանյանը շնորհակալություն հայտնեց խորհրդարանական այն խմբակցություններին, որոնք «Շրջանառության հարկի մասին » օրենքի վերաբերյալ իրենց ունեցած դժգոհությունների հարցում աջակցում են իրենց, և հատուկ շնորհակալություն հայտնեց ԱԺ պատգամավոր, գեներալ Սեդրակ Սարոյանին՝ ասելով, թե ցանկություն ունեն հանդիպելու նրան, ինչպես նաև հույս ունեն, որ նա միջնորդը կդառնա ՓՄՁ ներկայացուցիչների և հանրապետականների միջև:
«Վարչապետն ընդունել է մեր ներկայացուցիչներից մի քանիսին և ասել է, թե 3-4 օրվա ընթացքում մեզ պատասխան կտան: Այդ պատասխանը մեզ չգոհացրեց, և մենք որոշել ենք երկուշաբթի օրը կրկին հավաքվել և բողոքի ակցիա իրականացնել», -ասաց Ստեփան Ասլանյանը՝ նշելով, թե իրենց մեջ կան միջին բիզնեսի ներկայացուցիչներ և իրենք կարծում են, որ հենց նրանք են վարչապետին ներկայացրել իրենց խնդիրները:
«Մեր պահանջն առաջին օրվանից ինչպես եղել է, այնպես էլ շարունակում է մնալ նույնը. պահանջում ենք կա՛մ կասեցնել շրջանառության հարկի մասին օրենքը, կա՛մ երկու օրենքներն էլ թողնել ուժի մեջ, որպեսզի տնտեսվարողներն ազատ հնարավորություն ունենան երկու հարկադրույքից էլ օգտվելու»,- հայտարարեց Ստեփան Ասլանյանը:
Բանախոսն ասաց, թե ուզում է հավատալ վարչապետի խոսքին, ով ասել է, թե փոքր բիզնեսին վտանգ չի սպառնում, սակայն կարծում է, որ պետք է լինեն հստակ երաշխիքներ, որի արդյունքում «փոքր բիզնեսը կկարողանա հանգիստ շունչ քաշել»:
