Եվրամիության սահմանած պատժամիջոցների տակ հայտնված «Роснефть» ընկերությունն ու ռուս միլիարդատեր, ՌԴ նախագահ Վլադիմիր Պուտինի ընկեր Արկադի Ռոտենբերգը հայց են ներկայացրել Եվրոպական դատարան, գրում է «Ведомости»-ն՝ հղում անելով Financial Times-ին:
«Роснефть»-ը հայց է ներկայացրել Եվրոպական խորհրդի դեմ հոկտեմբերի 9-ին՝ խնդրելով չեղարկել հուլիսի 31-ին կայացված որոշումը, որը փաստացիորեն փակել է իր, ինչպես նաև ևս մի քանի պետական էներգետիկ ընկերությունների և բանկերի համար կապիտալի եվրոպական շուկան: Հայցը ներկայացվել է «Роснефть»-ի և այլ չնշված անձանց կողմից:
Արկադի Ռոտենբերգը հոկտեմբերի 10-ին նույն դատարանում բողոքարկել է Եվրոպական խորհրդի հուլիսին կայացրած որոշումը ԵՄ-ի երկրներ մուտքի արգելքի և ակտիվների սառեցման մասին:
Սեպտեմբերին Իտալիայի ֆինանսական ոստիկանությունն արգելափակել է այդ երկրում գտնվող Ռոտենբերգի ունեցվաքը: Մասնավորապես՝ կալանքի տակ են հայտնվել Կալյարիում գտնվող առանձնատունը և բնակարանը, Տարկվինիայում գտնվող առանձնատունը, Արզակենայում գտնվող երկու առանձնատներ և լյուքս դասի Berg Luxury հյուրանոցը Հռոմի կենտրոնում:
Corriere della Sera թերթի տվյալներով՝ այդ ակտիվների ընդհանուր գումարը մոտ 30 միլիոն եվրո է: Ռոտենբերգն իտալական ոստիկանության գործողություններն «անօրինական և աբսուրդ» է անվանել: