2015 թ. բյուջեով Կառավարությունն աշխատող հղիների նպաստի որևէ կրճատում չի հաշվարկել, որովհետև բյուջեն ներկայացնելիս այդ օրենսդրական փաթեթը չկար. այս մասին լրագրողների հետ զրույցում ասաց ֆինանսների փոխնախարար Պավել Սաֆարյանը:
«Այսինքն՝ հղիները ստանում են այնքան աշխատավարձ, ինչքան կազմել է վերջին տարում, իսկ չաշխատողներն էլ չեն ստանում, այսինքն՝ բյուջեում հարցն ընդգրկված է գործող օրենսդրությամբ»,-ասաց նա և նշեց, որ եթե իր անձնական կարծիքն է հետաքրքրում, ապա կարող է փաստել, որ խնդիր կա և պետք է ինչ-որ կերպ լուծել:
«Այդ խնդիրը, թեկուզ թվաբանորեն, կա, եթե ոչ ռեալ բարձր աշխատավարձ են նշանակում, պետությունը լրացուցիչ գումարներ է տալիս: Մեկն ասում է՝ մորաքրոջս տղան է, կնոջը բերեմ, մի հինգ-վեց ամիս ձևակերպեն բարձր աշխատավարձով, ու դեռ գործի էլ չի գնում, հետո պետությունը պարտավոր է վճարել: Ընդունենք, որ խնդիրը կա, և այլ բան է, թե այդ խնդիրը ոնց ենք ուզում լուծել: Եկեք ռեալ քննարկման դաշտում խոսենք, դուրս չգա, որ դուք կարմիր գվարդիան եք, մենք էլ՝ սպիտակ գվարդիականներն ենք: Հիմա լուծումները ճիշտ են, թե ոչ, չեմ կարող հստակ ասել, բայց Կառավարությունն այս լուծումն է տվել»,-նշեց նա։
Փոխնախարարը հարցի լուծման իր տարբերակն առաջարկեց։ «Ես, օրինակ, պատկերացնում եմ, որ հարցի ճիշտ լուծումն այն է, որ ինչ-որ մեկն էլ ուրիշ մոտեցում պետք է առաջարկի, այսինքն՝ Կառավարությունը կարող է լավ լուծում չի առաջարկում, և հնարավոր է, որ ինչ-որ մեկն ավելի լավ լուծում կառաջարկի»,-նշեց նա:
Պավել Սաֆարյանի խոսքով՝ ուղղակի մարդիկ սովորել են ոչինչ չանել, բայց լուծումներում խնդիր փնտրել. «Սովորել են, որևէ մեկը մի բան չասի՝ պատգամավորներ, հանրություն և այլն, բայց տեսնեն, երբ մեկը մի բան է առաջարկում, ասեն՝ հլա նայենք, տեսնենք, դրանց սխալները ոնց ենք գտնում, երեսին տանք»:
