ԱԺ-ում 2015թ. բյուջեի նախագծի քննարկմանը տրանսպորտի և կապի նախարարի առաջին տեղակալ Արթուր Առաքելյանը հայտարարեց, թե նախարարությունը 2015թ. բյուջեն ծրագրել է իրականացնել նոր մեխանիզմով:
«Մշակված է ծրագիր՝ 34 ցուցանիշներով, որոնցով հնարավոր կլինի բնութագրել բյուջետային ծախսերի արդյունավետությունը, ծրագրի անձնագրում ներառվել են ՀՀ մարզպետարանների կողմից և նախարարության կողմից իրականացվող ծախսերը»,-ասաց փոխնախարարը:
Նրա խոսքով՝ այս փոփոխության շնորհիվ նախարարությունը կկարողանա ճշգրիտ ցուցանիշների հիման վրա հաշվետու լինել կոնկրետ կատարողականի ծախսերի համար:
«Նախարարությունը նախատեսում է 34,9 միլիարդ դրամ ծախսեր, նախատեսվող հատկացումների հաշվին իրականացվելու են 19 ծրագրեր, որոնցից յոթը վարկային ծրագրերն են, վեցը վերաբերում են Հյուսիս-Հարավ ճանապարհային միջանցքին, իսկ մեկը ՀԲ-ի հետ համատեղ իրականացվող կենսական նշանակության ճանապարհների արդիականացման ծրագրերին»,-ասաց Առաքելյանը:
Փոխնախարարը նշեց, որ բյուջեի նախագծով նախատեսվել է շուրջ 4 միլիարդ դրամ կապիտալ ծախսեր՝ ներդրում վերանորոգման համար:
