Ռուսաստանում ալկոհոլային արտադրանքը ծխախոտային արտադրանքի պես կարող է հեռացվել գնորդների տեսադաշտից:
Ռուսաստանի լիբերալ-դեմոկրատական կուսակցության պատգամավորները պատրաստել են սպիրտային արտադրանքի արտադրությունն ու շրջանառությունը կարգավորող օրենքում փոփոխություններ, հաղորդում է BBC-ի ռուսական ծառայությունը:
Օրինագծի փոփոխությունների նպատակը ցանկացած տեսակի ալկոհոլային արտադրանքի, ներառյալ՝ գարեջրի ցուցադրումն արգելելն է խանութների դարակներում և ցուցափեղկերին: Այդ մասին հայտնել է Պետդումայի պատգամավոր Անդրեյ Սվինցովը:
Նրա խոսքով՝ ալկոհոլային արտադրանքը պետք է դրվի ոչ թափանցիկ պատուհանով առանձին պահարաններում, որոնց վրա պետք է լինի հատուկ գրություն և վաճառողին կանչելու կոճակ:
Նման դարակներ կարելի է հանդիպել խոշոր սուպերմարկետներում, դրանցում սովորաբար պահվում է թանկարժեք ալկոհոլը:
Սվինցովը համոզված է, որ ալկոհոլային արտադրանք արտադրողներն այդ առաջարկից չեն ուրախանա, սակայն «դա այնքան էլ մեծ կորուստ չի լինի, համեմատած նրա, թե քանի մարդ է օրական մահանում ալկոհոլի չարաշահումից»: