Հայաստանի Կենտրոնական բանկը 2014 թ. տնտեսական աճը գնահատել է 3.1-3.6 տոկոս միջակայքում` պայմանավորելով գյուղատնտեսության և ծառայության ճյուղերի աճով: ԿԲ կանխատեսման համաձայն` առաջիկա 3 տարում տնտեսական աճն աստիճանաբար կարագանա և կկայունանա իր ներուժի շրջակայքում: Դա պայմանավորված է մասնավոր սպառման աճի տեմպերի արագացմամբ և մասնավոր ներդրումների դանդաղ տեմպերով վերականգնմամբ:
Կենտրոնական բանկի կանխատեսման համաձայն` ապրանքների ու ծառայությունների արտահանման և ներմուծման իրական աճը կհավասարակշռվի 6 տոկոսի շուրջ, իսկ ֆիզիկական անձանց դրամական փոխանցումների մասով ակնկալվում է զուտ 3 տոկոս նվազում: Կարճաժամկետ հատվածում 12-ամսյա գնաճը աստիճանաբար կմոտենա նպատակային ցուցանիշին և կկայունանա դրա շուրջ, իսկ 2015 թ. և հաջորդող երկու տարում կտատանվի թույլատրելի միջակայքի սահմաններում` 4% +1.5 տոկոսային կետ:
Արտաքին և ներքին տնտեսական զարգացումների անորոշությունների պարագայում Կենտրոնական բանկը կանխատեսում է, որ տնտեսական աճը կվերականգնվի դանդաղ տեմպերով և աստիճանաբար կմոտենա երկարաժամկետ հավասարակշիռ մակարդակին:
2014 թ. երրորդ եռամսյակում տնտեսական ակտիվության միջավայրը որոշ չափով ընդլայնվել է, այնուամենայնիվ, տնտեսական աճի մակարդակը դեռևս ցածր է: Երրորդ եռամսյակում ցածր ներքին պահանջարկի մասին են վկայում մասնավոր սպառման նվազումն ու ներդրումային թույլ ակտիվության պահպանումը. 2014 թ. երրորդ եռամսյակում մասնավոր սպառման մասով գնահատվում է 1 տոկոս նվազում, իսկ մասնավոր ներդրումների աճը` 2 տոկոս:
Կարճաժամկետ կանխատեսումների համաձայն` մասնավոր սպառման աճի տեմպը կշարունակի դանդաղել, իսկ ներդրումային միջավայրը` կայունանալ, ինչի պարագայում 2014 թ. մասնավոր սպառումը կնվազի 1.4 տոկոսով, իսկ մասնավոր ներդրումները կաճեն 1.4 տոկոսով: Տարվա ընթացքում նախատեսվող ընդլայնողական հարկաբյուջետային քաղաքականության արդյունքում հարկաբյուջետային ազդակը (նախորդ տարվա համեմատ) գնահատվում է փոքր:
