Արագածոտնի մարզի Սասունիկ Համայնքում գտնվող «Արմենիա վայն» գործարանը այսօր առաջին անգամ սկսեց «Արմենիա» շամպայնի շշալցումը, ինչի առիթով այսօր ՀՀ նախագահ Սերժ Սարգսյանը այցելեց գործարան և ծանոթացավ գործարանում իրականացվող աշխատանքների հետ:
Շամպայնի շշալցումը գործարանում իրականացվելու է հանրահայտ «Շառմա» մեթոդով, որն առաջին անգամ կիրառվել է 1907թ.-ին Ֆրանսիայում: Ինչպես լրագրողների հետ զրույցում ասաց գործարանի արտադրության տնօրեն Մաթիո Բեսնեն, շամպայնի պատրաստման ողջ գործընթացը բնական է և օգտագործվում են այն նույն մեթոդները, ինչ Ֆրանսիայում։
«Մեր նպատակը շամպայնի որակը բարձրացնելն է՝ ֆրանսիական, իտալական շամպայնների մակարդակին հասցնելը: Մենք կունենանք թարմ բալանսավորված թթվայնությամբ շամպայն, բնական արմատով և նուրբ պղպջակներով: Այդ պղպջակները գոյանում են բնական գործընթացի շնորհիվ, ոչ թե արհեստական»,- ասաց նա և վստահեցրեց, որ մինչև Ամանոր «Արմենիա» կիսաքաղցր և բրուտ տեսակի շամպայնները դուրս կբերվեն շուկա:
Ֆրանսիական «Բորդո» գործարանից ժամանած մասնագետ, ներկայումս «Արմենիա վայն» գործարանի գլխավոր կոնսուլտանտ Ժան Բատիստ Ֆուլան ընդգծեց, որ այսօր ընկերությունը հպարտ է արտադրել իր առաջին շամպայնը, որը բարձրորակ արտադրանք է՝ արտադրված լավագույն ժամանակակից տեխնոլոգիաներով:
Հարցին, թե ինչքանով է այն մրցունակ եվրոպական շուկայում, պատասխանեց. «Մեր և՛ շամպայնը, և՛ գինին բարձրորակ են և ուրախ կլինեի, որ անգամ Բորդոյում արտադրվող բոլոր գինիները ունենային այն որակը ինչ «Արմենիա վայնում»: Հայաստանը օրհնված է, որովհետև այստեղ կարողանում են արտադրել բարձրորակ խաղող, իսկ նման խաղող ամեն տեղ չէ, որ արտադրվում է»,- ասաց նա և ընդգծեց, որ Հայաստանի հողն ու ջուրը ևս յուրահատուկ համ են տալիս արտադրանքին: