Տարադրամը բոլոր տեղերում է արժեզրկվում, այդ թվում նաև՝ եվրոն, լարին: Այս մասին լրագրողների հետ հանդիպման ժամանակ ասաց ԱՄՀ մշտական ներկայացուցիչ Թերեզա Դաբան Սանչեսը՝ անդրադառնալով դրամի արժեզրկմանը:
«Այս արժեզրկումը այնպիսի մեխանիզմ է, որի միջոցով տնտեսությունը ճշգրտվում է նոր իրավիճակի»,- ասաց նա և նշեց, որ արդյունքում ներմուծվող ապրանքների գները կբարձրանան, ինչը կօգնի նաև ներքին արտադրանքի մրցունակությանը, սակայն անխուսափելի է ներկրվող ապրանքների գների աճը:
«Սակայն այս ազդեցությունը գնաճի վրա կառավարելի է: Այս իրավիճակում գնաճը շատ ցածր է և տնտեսության իրավիճակը հնարավորություն է տալիս կլանելու այս անցումային ազդեցությունները: Ամենակարևորը ֆինանսական կայունության պահպանումն է: Կառավարելի է դրամի արժեզրկումը, որովհետև գնաճը ցածր է Հայաստանում»,- ասաց նա և նշեց որ կայունությանը զուգահեռ պետք է տնտեսության աճը զարգացնել և բարեփոխումներ իրականացնել:
Թերեզա Դաբան Սանչեսը նշեց, որ շարունակվոմ է փխրուն մնալ համաշխարհային տնտեսության վերականգնումը և աշխարհաքաղաքական զարգացումները մտահոգիչ են դառնում:
Ինչ վերաբերում է Հայաստանի Կենտրոնական բանկի գործունեությանը, ապա ԱՄՀ մշտական ներկայացուցիչն ասաց, որ ԿԲ-ն իրավիճակը մոնիթորինգ է ներկայացնում: «Բարդ իրավիճակ է ստեղծվել: Կենտրոնական բանկը պետք է կառավարի իրավիճակը»,-ասաց նա:
Ինչ վերաբերում է հարցին, թե առաջիկայում փոխարժույթի առումով ինչ կարելի է սպասել, ասաց, որ չի կարող այդ հարցին պատասխանել, սակայն ԿԲ-ն ունի բավարար չափով պահուստներ, ունի ԱՄՆ-ի և մյուս կազմակերպությունների օժանդակությունը: Նա կարևոր է համարոմ բուֆերների ստեղծումը, որոնք կարող են օգտագործվել ցնցումների ժամանակ, ժամանակն է, որ Հայաստանը օգտագործի այն գործիքը, որն ունի, և դա բյուջեն է:
Թերեզա Դաբան Սանչեսը հայտնեց, որ իրենք օժանդակում են 2015 թվական պետական բյուջեն, որովհետև այն հնարավորություն է տալիս դեֆիցիտի ցուցանիշն ավելացնել:
