Այսօր կանայք տարբեր խնդիրներով են դիմում հոգեբանին: Ցանկացած կնոջ կյանքում առաջնային, կենսականորեն կարևոր ոլորտը միջանձնային փոխհարաբերություններն են:
Հոգեբանների դիտարկմամբ` կանանց ամենից շատ հուզող խնդիրները շարունակում են մնալ միջսեռային-սիրային, ամուսնական և ընտանեկան փոխհարաբերությունների հետ կապված հարցերը: Այդ թվում, բնականաբար, նաև երեխաների և նրանց զարգացման ու առողջության հետ կապված խնդիրները: Հաջորդը աշխատանքի և կարիերայի հետ կապված հարցերն են, բայց դրանց թվում, միևնույնն է, առաջին պլանում փոխհարաբերությունների հետ կապված խնդիրներն են:
Երիտասարդ աղջիկների և կանանց մոտ վառ արտահայտված է նաև ինքնազարգացման, ինքնակատարելագործման ձգտումը, և նրանք հոգեբաններին շատ են դիմում անձի զարգացման զանազան դասընթացների և սեմինարների մասնակցելու համար:
Հոգեբանորեն բարդ փուլերն այն ժամանակ են վրա հասնում, երբ աղջիկը, կինը անձնական նշանակալի փոխհարաբերությունների հետ կապված ընտրության առջև է կանգնում և իր համար կարևոր որոշումներն է կայացնում:
Անձնական, առավել ևս ամուսնա-ընտանեկան հարաբերությունները ներկայումս բարդացել են, անհատականացել են, դրանք մի շարք պահանջներ են ներկայացնում ինչպես կանանց, այնպես էլ տղամարդկանց: Բազմաթիվ ունակություններ ու կարողություններ են պահանջվում երջանիկ փոխհարաբերություններ, մասնավորապես երջանիկ և ամուր ընտանիք ստեղծելու և այն պահպանելու համար: