ՀՀ կրթության և գիտության նախարարության և «Թիչ Ֆոր Արմենիա» հասարակական կազմակերպության միջև կնքվել է փոխըմբռնման հուշագիր, որը ստորագրել են ՀՀ կրթության և գիտության նախարար Արմեն Աշոտյանը և «Թիչ Ֆոր Արմենիա» հասարակական կազմակերպության հիմնադիր և գործադիր տնօրեն Լարիսա Ռայանը: Փոխըմբռնման հուշագրով կարևորվում է ՀՀ հանրակրթական ուսումնական հաստատություններում երիտասարդ կադրերի ներգրավումը, աշակերտների համար կրթական ռեսուրսների մատչելիության անհրաժեշտությունն ու կուտակված միջազգային փորձի կիրառումը, ինչպես նաև հանրակրթության մեջ բարձրագույն կրթություն ստացած մասնագետների գիտելիքների ներդրումը: Փոխըմբռնման հուշագրի նպատակն է համատեղել ստորագրող կողմերի ջանքերը հանրակրթության բնագավառում երիտասարդ մասնագետների ներգրավման և աշակերտներին որակյալ կրթություն ապահովելու ուղղությամբ:
Հուշագրի կողմերի համագործակցության ուղղություններից են համապատասխան առարկաների ուսուցչների կարիք ունեցող հանրակրթական ուսումնական հաստատությունների հստակեցում, ուսուցիչների թափուր հաստիքների և աշակերտների առաջադիմության վերաբերյալ տեղեկատվության տրամադրում, երիտասարդ մասնագետների ուղղորդում դեպի դպրոցներ և մանկավարժության գծով որակավորում, ինչպես նաև ուսուցիչների գործուղում Հայաստանի կարիքավոր դպրոցներ:
