Կաննի 68-րդ կինոփառատոնում «Փոքր Ոսկյա արմավենու ճյուղ» մրցանակին լավագույն կարճամետրաժ ֆիլմի համար արժանացել է լիբանանցի երիտասարդ ռեժիսոր Էլի Դագերը:
Ինչպես հաղորդում է ТАСС-ը` Դագերի «Ալիքներ-98» (Waves ‘98) 15 րոպեանոց կարճամետրաժ անիմացիոն ֆիլմը ժյուրիի որոշմամբ ճանաչվել է լավագույնը:
Կաննի կինոփառատոնի ժյուրին «Ոսկյա արմավենու ճյուղ» մրցանակը շնորհել է Ժակ Օդիարին` «Դիպան» ֆիլմի համար:
Գրան պրի մրցանակին արժանացել է հունգար ռեժիսոր Լասլո Նեմեշի «Սաուլի որդին» դեբյուտային կինոնկարը:
Տղամարդու լավագույն դերի համար մրցանակը Կաննի կինոփառատոնի ժյուրին հանձնել է ֆրանսիացի դերասան Վենսեն Լենդոնին: Այս մրցանակին Լենդոնն արժանացել է Ստեֆան Բրիզեի «Շուկայի օրենքը» սոցիալական դրամայում իր դերակատարության համար:
Կնոջ լավագույն դերի համար Կաննի կինոփառատոնի ժյուրին մրցանակ է շնորհել երկու դերասանուհու` հոլիվուդյան աստղ Ռունի Մարային և ֆրանսուհի Էմանուել Բերկոյին:
Մարան մրցանակն ստացել է 1950-ականներին երկու կնոջ սիրո մասին «Քերոլ» ֆիլմի համար, որում նկարահանվել է նաև Քեյթ Բլանշետը: Բերկոյին մրցանակ են շնորհել «Իմ թագավոր» (Mon roi) ֆիլմում դերակատարության համար:
Լավագույն ռեժիսուրայի մրցանակին արժանացել է թայվանցի ռեժիսոր Հոու Սյաոսյանը «Մարդասպանը» ֆիլմի համար:
