Մինչ Չինաստանի և Հունաստանի տնտեսություններն անկում են ապրում, որոշ միջազգային փորձագիտական խմբեր մտավախություն ունեն, որ ԱՄՆ տնտեսությունը նույնպես կարող է հայտնվել ծանր վիճակում: Ճիշտ է՝ ԱՄՆ տնտեսությունը 2015 թ-ի սկզբի անկումից հետո կարծես թե վերականգնվում է, սակայն Տնտեսական համագործակցության և զարգացման կազմակերպությունը հրապարակել է ազգային պարտքի վերաբերյալ վերջին տվյալները, որոնք հուսադրող չեն աշխարհի խոշորագույն տնտեսությունն ունեցող երկրի համար:
Վերոնշյալ զեկույցի համաձայն, ԱՄՆ-ն աշխարհի տնտեսապես զարգացած երկրների պարտքային ցուցակում վեցերորդ տեղն է զբաղեցնում: 2007թ-ին ՀՆԱ-յի նկատմամբ պարտքը կազմում էր 76 տոկոսից ավելի քիչ: 2014 թ-ին այս ցուցանիշն աճեց՝ հասնելով 122,6 տոկոսի: Նշենք, որ թվերում ներառված չեն չֆինանսավորվող պարտավորությունները՝ սոցիալական և բժշկական ապահովագրությունը, ինչը նշանակում է, որ իրականում վիճակը կարող է շատ ավելի դաժան լինել:
Պարտքային ցուցակը գլխավորում է Հունաստանը՝ ՀՆԱ-յի նկատմամբ պարտքը կազմում է 181 տոկոս, երկրորդ տեղում Իտալիան է՝ 156 տոկոս, այնուհետև Պորտուգալիան՝ 149 տոկոս, Բելգիան՝ 129 տոկոս, Իռլանդիան՝ 127 տոկոս, որին էլ հաջորդում է ԱՄՆ-ն: Ճապոնիան կարող էր գլխավորել ցուցակը, սակայն այն կազմելու պահին վերջինիս վերաբերող տվյալները դեռևս պատրաստ չեն եղել: 2012թ-ից սկսած Ճապոնիայի պարտքը ՀՆԱ-յի նկատմամբ կազմում է 235 տոկոս:
Ուսումնասիրությունների արդյունքում պարզվել է, որ ԱՄՆ պետպարտքը կազմում է 18,3 տրիլիոն դոլար, ինչը բնական է պետք է մտահոգիչ լինի աշխարհի խոշորագույն պետության համար:
