ԱՄՆ-ի նախագահ Բարաք Օբաման եւ Ճապոնիայի կառավարության նախագահ Սինձո Աբեն հեռախոսազրույցի ընթացքում քննարկել են համաշխարհային ֆինանսական շուկայում առկա վիճակը, ինչպես նաեւ Կորեական թերակղզում ստեղծված իրավիճակը:
Այդ մասին օգոստոսի 26-ին մամուլի ասուլիսին հաղորդել է Ճապոնիայի կառավարության գլխավոր քարտուղար Յոսիհիդե Սուգան:
Աբեն եւ Օբաման պայմանավորվել են սերտորեն համագործակցել համաշխարհային շուկաներում բաժնետոմսերի անկման հետ կապված, ինչպես նաեւ արտահայտել են իրենց հավանությունը Կորեական թերակղզում լարվածության թուլացման կապակցությամբ:
Օբաման հույս է հայտնել Անդր-Խաղաղօվկիանոսյան գործընկերության վերաբերյալ պայմանագրի մոտալուտ կնքման, ինչպես նաեւ համաշխարհային խնդիրների լուծման նպատակով Ճապոնիայի հետ դաշնակցային հարաբերությունների ամրապնդման մասին, հաղորդում է Ria.ru-ն:
Միաժամանակ, վարչապետ Աբեն մտահոգություն է հայտնել այն տեղեկության կապակցությամբ, թե ամերիկյան ազգային անվտանգության գործակալությունը գաղտնալսել է Ճապոնիայի բարձրաստիճան պաշտոնյաներին եւ քաղաքական գործիչներին:
