Պատմաբան Աշոտ Ներսիսյանն այսօր հրավիրված մամուլի ասուլիսին ասաց, որ բոլոր երկրները ու հատկապես՝ գերտերությունները միշտ հետապնդում են իրենց շահը և Հայոց ցեղասպանության հարցը շահարկում են Թուրքիայի հետ հարաբերությունների վատթարացման դեպքում:
«Ինչ հարց, որ լուծել ենք մինչ օրս, արել ենք ինքներս ու չպետք է մտածել, որ մի գեղեցիկ օր Թուրքիան կճանաչի Հայոց ցեղասպանությունը: Ինչպե՞ս կարող ենք պարտադրել, որ Արևմտյան Հայաստանում ներկայումս բնակվող քրդերը դուրս գան իրենց տներից, որ հայերը գնան տեր լինեն իրենց պապերի բնակավայրին: Կարող է ծանր հնչել որոշ մարդկանց ականջներին, բայց ես կարծում եմ, որ մենք պետք է դրացիական հարաբերություններ հաստատենք»,- ասաց նա:
Պատմաբանն ընդգծեց, որ սովորաբար իրենք՝ պատմաբանները, միշտ անդրադառնում են դեպքերին՝ նշելով, թե ինչպես են դրանք տեղի ունեցել, այնինչ անհրաժեշտ է պատասխանել «ինչո՞ւ են տեղի ունեցել» հարցին:
«Ցեղասպանությունը պետք է դառնա ցեղասպանագիտություն, և ուսումնասիրվեն պատճառները ու հետևանքները վերացնելու հնարավորությունները: Ներկայումս խոսում ենք հատուցման մասին, բայց դժվար է պատկերացնել, թե ինչպես է դա տեղի ունեցել, դրա համար մենք պետք է աշխատանք տանենք»,- ասաց նա:
