«Պոլիտեխնիկն արդեն տևական ժամանակ է, ինչ մամուլի ուշադրության կենտրոնում է՝ էլ «կոռուպցիոն» ռեկտոր, էլ սեքս սկանդալ, էլ լողավազանի կռիվ, դասախոսների դժգոհություններ։ Թվում էր, թե Ոստանիկ Մարուխյանի գալուց հետո մամուլը և գերատեսչությունները հանգիստ կթողնեն բուհը, բայց արի ու տես, որ Պոլիտեխնիկը չեն մոռանում։ Մեր տեղեկություններով՝ Պոլիտեխնիկով հետաքրքրվել է ֆինանսների նախարարության ստուգումների կազմակերպման և դիտարկումների վարչությունը, որը, ի դեպ, զբաղվում է հարկային ռիսկային ցանկում
հայտնված հաստատություններով։ Միթե նախկին ռեկտորներն այնպես են «աշխատել», որ Հայաստանի ազգային պոլիտեխնիկական համալսարանը ֆինանսատնտեսական ծանր
դրության մեջ է հայտնվել։
Նորանշանակ ռեկտոր Ոստանիկ Մարուխյանից որևէ տեղեկություն ճշտել չհաջողվեց, քանի որ ռեկտորը նեղացած է մեզնից, չի պատասխանում մեր զանգերին։ Ֆինանսների նախարարությունից էլ մեր գրավոր հարցմանն ի պատասխան հայտնեցին, որ ստուգումների կազմակերպման և դիտարկման վարչության կողմից «Հայաստանի ազգային պոլիտեխնիկական համալսարան» հիմնադրամում, իսկապես, իրականացվել է ուսումնասիրություն։ «Ուսումնասիրությամբ ընդգրկվել Է 2012թ. նոյեմբերի 1-ից 2015թ. սեպտեմբերի 19-ն ընկած ժամանակաշրջանը։ Այն սկսվել է սեպտեմբերի 15՝ին և տևել ընդամենը 4 օր՝ մինչև սեպտեմբերի 19-ը։ Ուսումնասիրության արդյունքում թերություններ չեն հայտնաբերվել»,–գրում է թերթը։
Մանրամասները՝ թերթի այսօրվա համարում։
