Թուրքիայում գործող DurDe հարթակը, որն առաջին անգամ Հայոց ցեղասպանությունը Ստամբուլի Թաքսիմ հրապարակում հիշատակել էր 2010 թվականին, ամեն տարի ավելի մեծ թվով մասնակցիներ է ունենում։
Կազմակերպությունը հաղորդագրություն է տարածել՝ նշելով, որ այս տարին նախորդներից տարբերվելու է, քանի որ Հայոց ցեղասպանության 100-րդ տարում հայկական սփյուռքի ավելի մեծաթիվ ներկայացուցիչներ են մասնակցելու միջոցառումներին։
Այդ նպատակով DurDe-ն համագործակցում է մի շարք միջազգային կառույցների ու հայկական սփյուռքի միությունների հետ, այդ թվում՝ ՀԲԸՄ-ի, ԱՄՆ-ում հայկական սփյուռքի ներկայացուցիչների նախաձեռնած «Project 2015»-ի, Եվրոպայի և այլ կառույցների հետ։
Ապրիլի 24-ին Ստամբուլում Հայոց ցեղասպանությանը նվիրված միջոցառման մասնակիցները նախ այցելելու են 2011 թվականի ապրիլի 24-ին զինվորական ծառայության ընթացքում սպանված ազգությամբ հայ Սևակ Շահին Բալըքչըի շիրիմին:
Դրանից հետո սփյուռքի ներկայացուցիչներն ու մարդու իրավունքների հարցերով ակտիվիստները հավաքվելու են Թաքսիմ հրապարակում։