Հայկական խաչքար է կանգնեցվել ֆրանսիական Վալանս քաղաքում Հայոց ցեղասպանության զոհերի հիշատակին, հայտնում է Հայաստանի սփյուռքի նախարարության մամուլի ծառայությունը։
Խաչքարը կանգնեցվել է Ֆրանսիայում գործող «Ֆրանսիա- Աշտարակ- Արմենիա» մշակութային միության նախագահ Լևոն Չատիկյանի ջանքերով և հովանավորությամբ:
Հաղորդման համաձայն` այդ խաչքարը 699-702 թթ. Ջուղայում տեղադրված խաչքարի կրկնօրինակն է՝ կերտված հայկական տուֆից:
Խաչքարի բացման հանդիսավոր արարողությանը ներկա են եղել Վալանս քաղաքի քաղաքապետ Նիկոլա Դարագոն, Լևոն Չատիկյանը, մի շարք պաշտոնական անձիք, հոգևոր այրեր և համայնքի ներկայացուցիչներ:
Միջոցառման ընթացքում ընթերցվել է ՀՀ սփյուռքի նախարար Հրանուշ Հակոբյանի ողջույնի խոսքը:
Վալանսի քաղաքի Իջևան հրապարկում` ի հիշատակ Հայոց ցեղասպանության 100-րդ տարելիցի, հայկական խաչքար տեղադրելու մասին որոշումը 2014 թվականի դեկտեմբերին ընդունել էր Ֆրանսիայի Վալանս քաղաքի ավագանին։ Որոշման կայացմանը նպաստել է անձամբ Վալանսի քաղաքապետ Նիկոլա Դառագոն: Որոշման դեմ բողոքել է թուրքական համայնքը, սակայն ապարդյուն:
