Ղազախստանում «Սուրբ Կարապետ» հայկական եկեղեցին, որը կառուցվել էր երկրի հայկական համայնքի ղեկավար Արտյուշա Կարապետյանի բարեգործական միջոցներով, ներկայումս վերանորոգվում է: Այս մասին ասել է Էջմիածնի մամուլի ծառայության ղեկավար Վահրամ Մելիքյանը՝ մեկնաբանելով եկեղեցու փակման մասին տեղեկությունները:
Մելիքյանը հաղորդել է, որ տվյալ պահին եկեղեցում կոսմետիկ վերանորոգման աշխատանքներ են իրականացվում, որոնք կավարտվեն մինչեւ Սուրբ Զատիկ:
Ավելի վաղ հաղորդել էինք, որ Ղազախստանի հայկական համայնքի ղեկավար Արտյուշա Կարապետյանը, ստացված տեղեկությունների համաձայն, փակել է «Սուրբ Կարապետը», փոխել է կողպեքն ու դուրս բերել ամբողջ ունեցվածքը՝ Ավետարանը, արծաթեղենն ու մոմերը:
Ղազախստանի Սուրբ Կարապետ աղոթատունը մատուռ է, որը կառուցվել է Արտյուշա Կարապետյանի բարերարությամբ:
Մատուռում այս օրերին կատարվում են ներքին հարդարման աշխատանքներ: Ինչպես տեղեկացրել է Ա. Կարապետյանը` այդ աշխատանքներն սկսվել են ընդառաջ հայ համայնքի ժողովականների խնդրանքի, որպեսզի Տիրոջ հրաշափառ Ս. Հարության տոնին մատուռը պատճաշ տեսք ունենա:
Մատուռը փոքր է, ունի 30 քմ մակերես, այդ իսկ պատճառով շինարարական աշխատանքներին զուգահեռ մոմավառություն կամ հավատացյալների այցելություն կազմակերպելը դյուրին ու անվտանգ չէ: Արտյուշա Կարապետյանը հավաստիացրել է, որ ներքին հարդարման աշխատանքները մի քանի օրից կավարտվեն և բարեզարդված մատուռը բաց կլինի բոլոր այցելուների համար:
