Հայաստանի ֆուտբոլի ֆեդերացիայի նախագահ Ռուբեն Հայրապետյանն այսօր «Red Eagles» ֆան շարժման ներկայացուցիչների հետ հանդիպման ընթացքում հայտարարել է, որ հրաժարական կտա, եթե թիմը ձախողվի աշխարհի 2018 թ. առաջնության ընտրական փուլում:
«Եթե առաջիկա ընտրական փուլում Հայաստանի հավաքականը ձախողվի, ես հրաժարական կտամ: Երբեք նման բան չեմ ասել, սակայն հիմա ասում եմ: Հայաստանի առաջնությունում տոտալիզատոր է մտել, և այդ աղբը ես պետք է մաքրեմ: Ավելին կասեմ. եթե ՖԱՖ-ը մի փոքր դադար տար, հրաժարական կտայի: Դրանով ինձ թասիբի գցեցին, և ես պետք է աշխատեմ»:
Խոսելով Եվրոպայի 2016 թ. առաջնության ընտրական փուլի Հայաստան-Ալբանիա խաղի մասին ավելի վաղ արած իր հայտարարության մասին՝ ՀՖՖ նախագահն ընդգծել է, որ դավաճանություն բառն ավելի լայն իմաստ ունի, և ինքը պարզապես ասել է, որ ֆուտբոլիստները խաղին չեն նվիրվել, լրջորեն չեն վերաբերվել մարզումներին:
