Սերբիայի խորհրդարանի պատգամավորները Հայոց ցեղասպանությունը ճանաչող և դատապարտող բանաձև են առաջարկել: Ըստ սերբական Blic.rs-ի, բանաձևի նախագիծն առաջարկել են Նոր կուսակցության պատգամավորները՝ կուսակցության նախագահ, նախկին վարչապետ Զորան Ժիվկովիչն ու Վլադիմիր Պավիչևիչը,գրում է News.am-ը:
«Ճանաչումը հայ ժողովրդի հետ Սերբիայի քաղաքացիների համերաշխության արտահայտություն կլիներ պատմական անարդարությունն ուղղելու համար պայքարում, որի նպատակն է, որպեսզի 1.5 մլն հայեր զանգվածային սպանությունը պաշտոնապես ցեղասպանություն բնորոշվի:
Օսմանյան կայսրության հայ բնակչության կանխամտածված և համակարգված ոչնչացումը սարսափեցնող մասշտաբների հասավ և դարձավ մարդկության պատմության ամենածանր հանցագործություններից մեկը: Այդ պատճառով բոլորի բարոյական պարտականությունն է ճանաչել Հայոց ցեղասպանությունն ու խստորեն դատապարտել այն»,- ասված է կուսակցության հայտարարությունում:
Կուսակցությունը Սերբիային և այլ երկրներին, ինչպես նաև միջազգային կազմակերպություններին կոչ է արել ճանաչել Հայոց ցեղասպանությունը՝ այդպիսով կանխարգելելով ապագայում նման հանցագործությունները, իսկ Սերբիայի կառավարությանն ու քաղաքացիներին կոչ է ապրիլի 24-ը նշել որպես Հայոց ցեղասպանության զոհերի հիշատակի օր:
