Այսօր՝ փետրվարի 26-ին, Ղրղզստանի Հանրապետության նախագահ Ալմազբեկ Աթամբաևն ընդունել է Եվրասիական տնտեսական հանձնաժողովի խորհրդի նախագահ Տիգրան Սարգսյանին:
Հանդիպման ընթացքում քննարկվել են Եվրասիական տնտեսական միության ներկայիս գործունեության առանցքային ուղղություններին, ակտուալ խնդիրների լուծմանը և ինտեգրացիոն միավորման հետագա զարգացման առաջնահերթություններին առնչվող հարցեր:
Ղրղզստանի Հանրապետության նախագահ Աթամբաևը նշել է, որ Եվրասիական տնտեսական միությանը Ղրղզստանի անդամակցությունը համընկել է համաշխարհային տնտեսությունում առկա ոչ դյուրին գործընթացների ժամանակաշրջանի հետ, ինչը նոր խնդիրներ և մարտահրավերներ է դնում ինտեգրացիոն միավորման բոլոր մասնակիցների առջև:
«Անհրաժեշտ է, որպեսզի ղրղստանցիների ինտեգրացիոն սպասելիքներն արդարացվեն», - ասել է Ղրղզստանի նախագահը:
Հանդիպման մասնակիցները նախագահ Ալմազբեկ Աթամբաևին տեղեկացրել են Ղրղստանի` Եվրասիական տնտեսական միությանն անդամակցելու շրջանակներում միջոցառումների իրականացման և եվրասիական ինտեգրմանը երկրի մասնակցության արդյունավետության բարձրացմանն ուղղված քայլերի մասին:
