Ավելի վաղ Analitik.am-ը, ուսումնասիրելով ՀՀ ազգային վիճակագրական ծառայության տվյալները, պարզել էր, որ վերջին 10 տարում Հայաստանի թանգարաններից պակասել է 136 հազ. 251 գեղանկարչական աշխատանք կամ դրանց թիվը պակասել է ավելի քան 4 անգամ, մինչդեռ Հայաստանում գործող թանգարանների թիվը նույն ժամանակահատվածում ավելացել է 19-ով: Բնականաբար, հարց էր առաջանում՝ ինչո՞ւ են պակասել թանգարանների գեղանկարչական աշխատանքները, եթե տարիների ընթացքում թանգարանների թիվն աճել է:
Այս կապակցությամբ մեր հարցմանն ի պատասխան՝ ՀՀ մշակույթի նախարարությունից տեղեկացրին, որ ՀՀ մշակույթի նախարարությունը կարող է փաստել միայն, որ 2003-2013 թվականներին իր համակարգի թանգարաններից գեղանկարչական առարկաներ չեն հանվել:
Մշակույթի նախարարության գրավոր պատասխանի մեջ, մասնավորապես, ասվում է.
«Ո՞րն է եղել նշված տարիների ընթացքում 136 հազ. 251 հատ գեղանկարչական աշխատանքի՝ թանգարաններից դուրս բերելու պատճառը» հարցին պատասխանելու համար պետք է ուսումնասիրել ՀՀ ազգային վիճակագրական վարչության կողմից հրապարակված հաշվետվությունները:
Ըստ հրապարակված նյութերի` առաջին անգամ գեղանկարչական նյութերի տարբերություն նկատվում է 2007 թվականին՝ 2006 թվականի համեմատությամբ. 2006 թ 191.1 ցուցանմուշի փոխարեն 2007 թ. 110.6, տարբերությունը` 80.8 միավոր:
Համեմատելով նշված տարիների թանգարանային հավաքածուները ըստ թանգարանների` նկատում ենք տարբերություն Երևան քաղաքի 2006-2007 թվակաների հաշվետվությունների միջև:
Այսպես` հաշվետվություն ներկայացրել են երկու դեպքում էլ 57 թանգարան, բայց հավաքածուների ընդհանուր քանակը 2006 թ. 2077.3 ցուցանմուշի փոխարեն՝ 2008.9 ցուցանմուշ, տարբերությունը` 68.4 ցուցանմուշ:
Քանի որ ՀՀ ԱՎԾ-ը թանգարաններից ստացած հաշվետվությունները ներկայացնում է ընդհանրական, չենք կարող պազել, թե որ թանգարանից և ի՞նչ հիմնավորումով է պակասում: Նման իրավիճակ տեսնում ենք, երբ համեմատում ենք 2008-2009 թվակաների գեղանկարչական նյութերը: 2008 թ. 108379 ցուցանմուշի փոխարեն 2009 թ. 44020 միավոր, տարբերությունը` 64359 միավոր»:
Այս տարբերության բացատրությունն, ըստ Մշակույթի նախարարության, առաջին անգամ գտնում ենք ՀՀ ԱՎԾ-ը «ՀՀ սոցիալական վիճակը 2009 թ-ի հրապարակման մեջ: «Նախորդ տարվա (2008) նկատմամբ գեղանկարչության առարկաներ ցուցանիշի 59.4%-ով նվազումը հիմնականում պայմանավորված է «Գեղագիտության ազգային կենտրոն» Պետական փակ բաժնետիրական ընկերության ֆոնդերից հաշվեկշռային արժեք չներկայացնող (պահպանման ոչ ենթակա) 64706 մանկական նկարների հաշվառումից հանելու հանգամանքով: Սույն անվանական տեղեկատվությունը հրապարակվում է հիշատակված ընկերության գլխավոր տնօրենի պաշտոնական համաձայնությամբ»,- ասված է ԱՎԾ-ի բացատրության մեջ: Նշված փաստը վկայում է, որ ՀՀ ԱՎԾ-ը կարող է ունենալ այդ տարբերությունների հիմնավոր պատճառները:
Այսպիսով, կարճ ասած՝ ՀՀ մշակույթի նախարարությունը չունի հետևյալ հարցի պատասխանը՝ ինչու՞ են վերջին տարիներին ՀՀ թանգարաններում պահվող գեղանկարչական աշխատանքները զգալի պակասել: Ըստ նախարարության՝ այդ հարցի պատասխանը պետք է տա ՀՀ ԱՎԾ-ն: Այս հարցի վերաբերյալ նշված կառույցի պատասխանը կհրապարակենք այն ստանալուն պես:
Եթե ընդհանուր պակասած գեղանկարների թվից՝ 136 հազ. 251, հանում ենք հաշվառումից հանված 64 706 մանկական գեղանկարները, ապա հարց է առաջանում, թե ի՞նչ են եղել մնացած գեղանկարները՝ մոտ 71 հազար գեղանկարներ:
