Նոյեմբերի 26-ի առավոտյան Լիսաբոնն արթնացել է հազարավոր մեքենաների ազդանշաններից: Այդպես Պորտուգալիայի մայրաքաղաքի բնակիչները հայտնել են իրենց բողոքը խորհրդարանի կողմից 2014թ. բյուջեն հաստատելու դեմ, որը սպասվում է այսօր երեկոյան: Քաղաքի մուտքի մոտ՝ ճանապարհների երկայնքով, «Դժգոհության ազգային օր: Սեղմեք ազդանշանը և հայտնեք ձեր դժգոհությունը» մակագրություններով պաստառներ են հայտնվել:
Ըստ մասնակիցների՝ Պորտուգալիայի ֆինանսական գլխավոր փաստաթուղթը «խախտում է պորտուգալացիների մեծամասնության իրավունքները», հաղորդում է ԻՏԱՌ-ՏԱՍՍ-ը:
Բյուջեի նախագիծը, որը, ինչպես սպասվում է, վերջնականապես ընդունելու է երկրի խորհրդարանը, նախատեսում է պետաշխատողների աշխատավարձերի, կրթության, առողջապահության և կենսաթոշակային ծախսերի կրճատում՝ 3,9 միլիարդ եվրոյի չափով: Այդ կապակցությամբ արհմիությունները քաղաքացիներին կոչ են արել դուրս գալ փողոցներ՝ իշխող դաշինքի և միջազգային վարկատուների «եռյակի» (ԵՄ, Եվրոպական կենտրոնական բանկ, ԱՄՀ) «հակաժողովրդական տնտեսական քաղաքականության» դեմ իրենց բողոքն արտահայտելու համար: