Հայաստանը Մաքսային միություն դատարկ ձեռքով չի գնում: Այս մասին Գյումրիում հայ-ռուսական միջտարածաշրջանային երրորդ համաժողովի բացմանը հայտարարել է Հայաստանի վարչապետ Տիգրան Սարգսյանը:
«Մենք վստահ ենք, որ կարող ենք թարմ հոսանք և նոր գաղափարներ մտցնել Միության կյանքում: Մեր երկիրը տրանսպորտային շրջափակման պայմաններում է, և, չունենալով բնական հարուստ պաշարներ, չունի նաև կայուն տնտեսական աճով բաց տնտեսության մոդել ստեղծելու հնարավորություն», – ասել է վարչապետը:
Այնուամենայնիվ, վերջին տարիներին հանրապետությունը կարողացել է բարեփոխել մի շարք պետական կառույցներ, ինչպես նաև բարենպաստ պայմաններ ստեղծել գործարարների և ներդրողների համար: «Համաշխարհային բանկի Doing Business ինդեքսում Հայաստանը զբաղեցնում է առաջին տեղը ԱՊՀ երկրների շարքում, իսկ աշխարհի 188 երկրների շարքում` 37-րդ տեղը: Համեմատական առավելությունների շարքին, որոնց օգտագործումը կարող է փոխշահավետ լինել և' Հայաստանի, և' ՄՄ-ի երկրների համար, կարելի է դասել նաև Մերձավորարևելյան տարածաշրջանի երկրների հետ աշխարհաքաղաքական հարևանությունը և բարեկամական հարաբերությունները: Բացի դրանից, դա նաև բարենպաստ տնտեսական ռեժիմն է եվրոպական երկրների հետ: Հայաստանն ունի GSP+ ռեժիմը ԵՄ-ի հետ, որը օգնում է մեր շատ ընկերություններին, այդ թվում նաև` Հայաստանում գործող ռուսական ընկերություններին, վաճառել իրենց ապրանքները ԵՄ-ի տարածքում առանց մաքսատուրքերի», – հայտարարել է վարչապետը:
Այս կապակցությամբ նա հիշեցրել է, որ վերջերս ԵՄ-ի դատարանը բավարարել էր «Ռուսալ» ԲԲԸ ընկերության միջնորդությունը և չեղյալ հայտարարել հակագնագցման (հակադեմփինգային) պարտականությունները Հայաստանում դրա դուստր ձեռնարկության` «Արմենալ» ՓԲԸ-ի համար: «Իսկ դա նշանակում է, որ մենք կարող ենք արտադրանքը վաճառել առանց սահմանափակումների` կիրառելով GSP+ ռեժիմը: Եվ Հայաստանում ռուսական կապիտալով գործող 1450 ձեռնարկություններ կարող են օգտվել հենց այդ արտոնյալ ռեժիմից: Մենք կարծում ենք, որ դա բարձրացնում է նաև Հայաստանի ներդրումային գրավչությունը: Եթե դրան հավելենք ազատ տնտեսական գոտին, ստեղծված «ՌԱՕ Մարս» ՓԲԸ-ի և Մերգելյանի անվան մաթեմատիկական մեքենաների գիտահետազոտական ինստիտուտի ռուսաստանցի գործընկերների հետ համատեղ բազայում, ապա կարելի է եզրակացնել, որ ռուսական ներդրողները կարող են այդ գոտում ներդրումներ կատարել և օգտվել հարկային արտոնություններից», – հավելել է Սարգսյանը: