Ինչպես Հայաստանի ֆուտբոլի հավաքականի գլխավոր մարզիչ, շվեյցարացի Բեռնար Շալանդի, այնպես էլ Ռուսաստանի թիմի գլխավոր մարզիչ, իտալացի Ֆաբիո Կապելոյի գլխին սև ամպեր են կուտակվել: Նրա ծառայություներից հրաժարվելը ևս օրակարգային է դարձել, հատկապես այն բանից հետո, երբ նրա ղեկավարած թիմը, օրերս կայացած Եվրոպայի առաջնության ընտրական մրցաշարի խաղում, 0:1 հաշվով պարտվեց Ավստրիայի ներկայացուցիչներին: Ընդ որում, կան նաև ֆինանսական չլուծված հարցեր: Այդուհանդերձ, Ռուսաստանի ֆուտբոլի միության փոխնախագահ Նիկիտա Սիմոնյանը դեմ է կտրուկ քայլեր ձեռնարկելուն: Նա գտնում է, որ պետք է ժամանակ տալ ազգային հավաքականի գլխավոր մարզչին, սպասել մինչև Եվրոպայի առաջնության ընտրական մրցաշարի ավարտը և միայն դրանից հետո, որոշում կայացնել: «Այժմ բոլորը խոսում են, որ պետք է հեռացնել նրան, հրավիրել Սլուցկիին, Կարպինին: Լավ, եթե Կապելոյին հեռացնենք և մեկ ուրիշը գա, և ի վերջո դուրս մնանք Եվրոպայի առաջնության մրցապայքարից, ումի՞ց ենք պատասխան պահանջելու գրանցված անբավարար արդյունքի համար: Միայն մեկ լուծում կա, պետք է շարունակել վստահել իտալացի մասնագետին»,- պարզաբանել է Սիմոնյանը:
Նիկիտա Սիմոնյանը դեմ է ֆուտբոլի հավաքականի գլխավոր մարզչին փոխելու կտրուկ քայլին
