Սպասվում էր, որ վերջին շրջանի իրադարձություններից հետո Ղրիմի ֆուտբոլի ակումբները հանդես կգան Ռուսաստանի առաջնությունում: Ուկրաինայի ներկայացուցիչները հակառակն էին պնդում, նշելով որ այդ թիմերը շարունակելու են հանդես գալ Ուկրաինայի առաջնությունում: Վճիռ պետք է կայացներ ՈւԵՖԱ-ն: Եվ ահա, վերջինս արգելել է Ղրիմի ակումբներին մասնակցել Ռուսաստանի առաջնություններին և մրցաշարերին:
ՈւԵՖԱ-ի որոշմամբ, Ղրիմը հայտարարվել է «հատուկ ֆուտբոլային գոտի» մինչև հաջորդ որոշումը: Կազմակերպությունը որոշել է ֆինանսական օգնություն ցույց տալ Ղրիմի ֆուտբոլին ենթակառուցվածքներին: ՈւԵՖԱ-ի պատվիրակությունը կմեկնի Ղրիմ տեղում և կծանոթանա իրավիճակին:
Ռուսաստանի ֆուտբոլի միության փոխնախագահ Նիկիտա Սիմոնյանը հայտարարել է, որ ռուսական կողմը կենթարկվի ՈւԵՖԱ-ի որոշմանը, որով Ղրիմի ակումբներին արգելվել է 2015-ի հունվարից մասնակցել Ռուսաստանի առաջնությանը:
«Չենք կարող անտեսել ՈւԵՖԱ-ի կամ ՖԻՖԱ-ի որոշումները: Իհարկե, պետք է ենթարկվենք ՈւԵՖԱ-ի որոշմանը, քանի որ դա եվրոպական ֆուտբոլի ղեկավար մարմին է, պարզապես, պարտավոր ենք ենթարկվել»,-ասել է նա:
