Հնդկաստանի Պուն քաղաքում անցկացվող մինչև 20 տարեկան շախմատիստների և
շախմատիստուհիների աշխարհի առաջնությունում փայլուն մրցելույթ է ունենում ՖԻԴԵ-ի
վարպետ, 20-ամյա Մարիա Գևորգյանը: Նա մինչև 18 տարեկան
խաղացողների Եվրոպայի առաջնության բրոնզե մեդալակիր է:
10-րդ տուրում, հանդես գալով սպիտակ խաղաքարերով, Մարիան առավելության հասավ Հնդկաստանի ներկայացուցիչ, 18-ամյա
Կատերիա Միշելի նկատմամբ: Ստուգատեսում մեր մարզուհին 3-րդ անընդմեջ հաղթանակը տարավ: Նա 6,5 միավորով 8-14-րդ տեղերը բաժանողների խմբում է:
Միանձնյա առաջատարը ռուսաստանցի 16-ամյա գրոսմայստեր Ալեքսանդրա Գորյաչկինան է՝ 8,5
միավոր:
Շախմատիստների մրցաշարում 19-ամյա գրոսմայստեր Կարեն Գիրգորյանին 10-րդ տուրում թեև
խաղում էր սպիտակներով, սակայն
չինացի 15-ամյա միջազգային վարպետ Բայ Ջինշիի հետ մրցամարտում բավարարվեց կես
միավորով:
Մրցաշարային աղյուսակում երկիշխանություն է: Չինացի գրոսմայստերներ Յի Վեյն ու Շանգլեյ Լուն
8-ական միավորով բաժանում են 1-2-րդ տեղերը: Գրիգորյանը նրանցից ետ է մնում 1 միավորով և
3-14-րդ հորիզոնականները բաժանողների թվում է:
Առաջնություններն անցկացվում են շվեյցարական մրցակարգով՝ 13 տուրով: Չեմպիոնների
անունները հայտնի կդառնան հոկտեմբերի 19-ին: