2015-ին Ադրբեջանի կայրաքաղաք Բաքուն հյուրընկալելու է առաջին անգամ անցկացվելիք Եվրոպայի օլիմպիական խաղերըի մասնակիցներին: Ստուգատեսի ծրագրում է նաև սամբոն:
Եվ ահա, Հայաստանի սամբոյի ֆեդերացիայի նախագահության նիստում քննարկվել է հայ սամբիստների մասնակցության հարցը և որոշվել է, որ մեր երկրի հավաքականը կմասնակցի այդ փորձությանը: Ավելին, ֆինանսական աջակցություն ստանալու դեպքում, մեր երկրի այս մարզձևի ներկայացուցիչները պարտավորվում են 2 մեդալ նվաճել:
Որոշումում մասնավորապես ասված է.
1. Մասնակցել «Բաքու-2015» Եվրոպական առաջին Օլիմպիական խաղերին:
2. Վերանայել 2015 թ. մարզական միջոցառումների օրացուցային պլանը և լրացումներ կատարել Հայաստանի սամբոյի հավաքական թիմերի նախապատրաստման ծրագրում:
3. Հանրապետական ընտրական մրցումներ անցկացնել մինչև 57, 90 կգ (տղամարդիկ) և մինչև 52 կգ (կանայք) քաշային կարգերում ուժեղագույն մարզիկներին բացահայտելու համար:
4. Ուսումնամարզական հավաքներ կազմակերպել և ապահովել մարզիկների մասնակցությունը երկու միջազգային մրցաշարերի «Բաքու-2015»-ի խաղերին պատշաճ պատրաստվելու և մասնակցելու համար:
5. Հայաստանի սամբոյի ֆեդերացիան պարտավորվում է «Բաքու-2015»-ի խաղերում նվաճել 2 մեդալ՝ Հայաստանի Ազգային օլիմպիական կոմիտեի կողմից անհրաժեշտ ֆինանսական օգնության տրամադրման դեպքում: