2015-ին Ադրբեջանի մայրաքաղաք Բաքվում կայանալու են Եվրոպայի օլիմպիական խաղերը: Համալիր այդ ստուգատեսին, որը կազմակերպվելու առաջին անգամ, հնարավոր է մասնակցեն նաև Հայաստսնի պատվիրակները:
Եվ ահա, նոյեմբերի 21-22-ին Բաքվում կայանալու է Եվրոպայի օլիմպիական կոմիտեի 43-րդ նստաշրջանը: Օրակարգում ընդգրկված հարցերից կարևորագույնը Եվրոպայի առաջին օլիմպիական խաղերի կազմակերպումն է: Նստաշրջանի աշխատանքներին կմասնակցեն նաև Հայաստանի ազգային օլիմպիական կոմիտեի գլխավոր քարտուղար Հրաչյա Ռոստոմյանը և վարչության պետ Վաղինակ Գալստյանը: Մեր երկրի ներկայացուցիչներն առաջին հերթին պետք է հաստակեցնեն, թե անվտւանգության ինչ երաշխիքներ կարող են ստանալ, եթե Հայաստանի պատվիրակները 2015-ին Բաքու ժամանեն:
Եվրոպայի օլիմպիական կոմիտեի նախագահ Պատրիկ Հիկեի գլխավորությամբ միջոցառման մասնակիցները կայցելեն օլիմպիական մրցումների համար նախատեսված մարզաբազաները, կծանոթանան նախապատրաստական աշխատանքների ընթացքին և այլն:
Հավելենք, որ վերջերս Երևան այցելած Եվրոպայի օլիմպիական կոմիտեի նախագահը պարզաբանել էր, որ եթե անգամ մեր երկիրը մարզիկներ չուղարկի Ադրբեջան, պատժամիջոցներ չեն կիրառվի: Նա պարզապես հայտնել էր, որ Հայաստանի հավաքականի մասնակցությունը միջոցառումն ավելի ուշագրավ կդարձնի:
ՀԱՕԿ-ի նախագահ Գագիկ Ծառուկայնն էլ հայտնել էր, որ մերոնց մասնակցության հարցը կվճռվի Հայաստանի տարբեր մարզաձևերի մարզիչների, նրանց սաների հետ անցկացվելիք քննարկումից հետո:
Հավելենք, որ Բաքվում մրցասպարեզ են դուրս գալու 20 մարզաձևերի ներկայացուցիչներ, որոնցից մի քանիսում Հայաստանը մեծ հնարավորություններ ունի մեդալներ նվաճելու:
Ի դեպ, Հայաստանի սամբոյի ֆեդերացիայի ներկայացուցիչներն արդեն տեղեկացրել են, որ ոչ միայն պատրաստ են Բաքու գնալ, այլև պարտավորվում են 2 մեդալ նվաճել:
