Ծանրամարտի Հայաստանի տղամարդկանց հավաքականի գլխավոր մարզիչ Փաշիկ Ալավերդյանը Հայաստանի ծանրամարտի ֆեդերացիայի պաշտոնական կայքի հետ զրույցում ասել է, որ գերծանր քաշային Ռուբեն Ալեքսանյան լիովին չի վերականգնվել դաստակի վնասվածքից ու բաց է թողնելու ապրիլին Թբիլիսիում կայանալիք Եվրոպայի առաջնությանը: Ռուբենը նախապատրաստվելու է նոյեմբերի 20-29-ը Հյուսթոնում կայանալիք աշխարհի առաջնությանը:
77 կգ քաշային կարգում հայտավորված մեր 3 ծանրորդներից՝ Տիգրան Գ. Մարտիրոսյան, Առաքել Միրզոյան, Անդրանիկ Կարապետյան, մեկը Աղասի Աղասյանի հետ միասին ելույթ կունենա 85 կգ քաշային կարգում: Այդ նպատակով այս եռյակի միջև շաբաթ օրը՝ մարտի 21-ին, փորձամրցում կանցակցվի, որի արդյունքով էլ կորոշվի, թե Թբիլիսիում նրանցից ով որ քաշային կարգում հանդես կգա:
Հիշեցնենք, որ մյուս քաշային կարգերում Թբիլիսիում Հայաստանը ներկայացնելու են Սմբատ Մարգարյանը (56 կգ), Ռուստամ Կարապետյանն ու Վանիկ Ավետիսյանը (երկուսն էլ 69 կգ), Աղասի Աղասյանը (85 կգ) և Սիմոն Մարտիրոսյանը (105 կգ):
Հավելենք նաև, որ թե՛ կանանց և թե՛ տղամարդկանց ծանրամարտի Հայաստանի ընտրանինները մրցավայր՝ Վրաստանի մայրաքաղաք են ուղևորվելու մարտի 27-ին, որպեսզի այնտեղ շարունակեն մարզումներն ու նախապատրաստությունը ՝ կլիմայափոխվեն ու հարմարվեն տեղի պայմաններին:
