Առևտրի համաշխարհային կազմակերպության նոր բարեփոխումն է հաստատվել։ 1995թ. ԱՀԿ-ի ստեղծումից հետո խոշորագույն բարեփոխման նախագիծը դեկտեմբերի 7-ին ստորագրել են անդամ երկրների առևտրի նախարարները՝ Բալիում անցկացված քառօրյա կոնֆերանսի արդյունքում։
Բարեփումը նախատեսում է մաքսային վերահսկողության բյուրոկրատական քաշքշուկի կրճատում, նախապատվություններ աղքատ պետություններին և զարգացող երկրների գյուղատնտեսներին սուբսիդավորելու արգելքների թուլացում, եթե դրանք օգնում են կարիքավորներին:
Նշվում է, որ ԱՀԿ-ի ղեկավար Ռոբերտո Ազեվեդոյի մշակած բարեփոխումների փաթեթի ընդունումը ձգձգվել էր Հնդկաստանի պատճառով, որը դեմ էր մթերային սուբսիդավորման վերացմանը: Ավելի ուշ Լատինական Ամերիկայի երկրները՝ Կուբան, Բոլիվիան, Վենեսուելան, Նիկարագուան, նույնպես արտահայտել էին իրենց դժգոհությունը: Ըստ կազմակերպության կանոնների՝ բարեփոխման հաստատման համար անհրաժեշտ է բոլոր 159 անդամ երկրների համաձայնությունը: Երկար խորհրդակցություններից հետո փաստաթուղթը հաջողվել է ստորագրել, հայտնում է «lenta.ru»-ն՝ վկայակոչելով Agence France-Presse-ը:
Ըստ տնտեսագետների գնահատման՝ բարեփոխությամբ նախատեսված միջոցառումները հնարավորություն կտան համաշխարհային առևտրի շրջանառությունն ավելացնել մեկ տրիլիոն դոլարով:
