Իշխող կոալիցիայում չընդգրկված ԱԺ քաղաքական չորս ուժերն արդեն բավականաչափ ստորագրություններ են հավաքել Սահմանադրական դատարան դիմելու համար՝ «Կուտակային կենսաթոշակների մասին» օրենքն ուժի մեջ մտնելը մեկ տարով հետաձգելու պահանջով:
ՀՅԴ խմբակցությունից հայտնել են, որ դիմումի տակ արդեն ստորագրել են 32 պատգամավորներ՝ անհրաժեշտ 27-ի փոխարեն: Ստորագրել են նաև ՀՅԴ խմբակցության Երևանում գտնվող հինգ անդամներից երեքը՝ Արծվիկ Մինասյան, Աղվան Վարդանյան և Արմեն Ռուստամյան: Ստորագրել են նաեւ ՀԱԿ, «Ժառանգություն», ԲՀԿ խմբակցության անդամները: ԲՀԿ-ից ստորագրել են ոչ միայն ակտիվ խորհրդարանականները՝ Նաիրա Զոհրաբյան, Վահե Էնֆիաջյան և այլք, այլև գործարար պատգամավորները՝ Մելիք Մանուկյանը և Վահան Գուլոյանը:
Ստորագրահավաքը կշարունակվի մինչև շաբաթվա վերջ: