Որոշ տնտեսագետներ խորհուրդ են տալիս Դանիային բնակության համար փակել մի քանի կղզիներ և, անգամ, վաճառել դրանցից մի քանիսը՝ պետական բյուջեի համալրման նպատակով, գրում է ИТАР-ТАСС-ը:
Դրանց բնակիչները տարիների ընթացքում ավելի ու ավելի են քչանում, իսկ մնացածների համար կոմունալ ծառայությունների ծախսերը, համապատասխանաբար, ավելանում են:
Օլբորգի համալսարանի տեղական պլանավորման ոլորտի ուսումնասիրող Յորգեն Մելերն առաջարկել է փակել կղզիներից մի քանիսը, քանի որ դրանք ապագա չունեն, իսկ ստացված գումարով նոր կյանք հաղորդել մյուս կղզիներին:
Դանիայում 27 փոքր կղզի կա, որոնց բնակչության թիվը կրճատվում է: Ներկայում դրանցում ընդհանուր առմամբ ապրում է մոտ 4.600 մարդ:
Մշտական բնակչությամբ փոքր կղզիների ազգային ասոցիացիայի ղեկավարը, սակայն, պնդում է, որ կղզիների գինը չի կարող արտահայտվել գումարով, դրանք պետք է պահպանել ոչ թե տնտեսական, այլ սոցիալ-մշակութային պատճառներով: