«Փաստ» թերթը գրում է. «Արագածոտնի մարզի դատախազ Վիգեն Միլիտոնյանը Բարձրաստիճան պաշտոնատար անձանց էթիկայի հանձնաժողովին է ներկայացրել իր՝ 2017 թ. տարեկան հայտարարագիրը:
Համաձայն հայտարարագրի՝ Միլիտոնյանը նախորդ տարի ձեռք է բերել նոր բնակարան, որի համար վճարել է 39 միլիոն 900 հազար դրամ: Ըստ նախորդ հայտարարագրերի՝ նրան է պատկանում նաև առանձնատուն և «LEXUS GX 470» մակնիշի ավտոմեքենա:
Դատախազի դրամական միջոցները նախորդ տարի կազմել են 10 միլիոն դրամ ու 10 հազար ԱՄՆ դոլար: Տարեկան եկամուտները ստացվել են 7 միլիոն 400 հազար դրամ աշխատավարձից և 15 միլիոն դրամ, 9 միլիոն 730 հազար դրամ, 6839 եվրո ու 93 հազար ԱՄՆ դոլար ստացված փոխառություններից՝ վարկերից:
Վիգեն Միլիտոնյանի անունը լրատվամիջոցներում առաջին անգամ շրջանառվեց մի զավեշտալի դեպքից հետո: 2013թ. Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանում քննվող մի գործի դատաքննության ժամանակ դատախազի ուղղությամբ պլաստմասե շիշ էր նետվել:
Հեղինակն ամբաստանյալ Արթուր Պետրոսյանն էր, ով մեղադրվում էր «Հրազդան» և «Սևան» քրեակատարողական հիմնարկներում պատիժ կրելու ընթացքում թմրամիջոցներ ձեռք բերելու և իրացնելու մեջ»:
Մանրամասն՝ թերթի այսօրվա համարում
