Ռուսաստանում տեղի ունեցած ֆուտբոլի աշխարհի առաջնության ժամանակ Արգենտինայի հավաքականի ֆուտբոլիստների և գլխավոր մարզիչի միջև լուրջ բախում է տեղի ունեցել: Այս մասին հայտնում է հայտնի լրագրող Արիել Սենոսյանը:
Սենոսյանը մասնավորապես գրել է խոսակցության մասին, որը տեղի է ունեցել գլխավոր մարզիչ Խորխե Սամպաուլիի և խաղացողների միջև խորվաթիայի դեմ խաղից հետո, երբ արգենտինացիները զիջեցին 3:0 հաշվով:
Նշվում է, որ ֆուտբոլիստներն օղակի մեջ են վերցրել մարզիչներին և մեղադրանքներ ուղղել նրանց հասցեին, ինչից հետո հետևյալ երկխոսությունն է տեղի ունեցել:
Ֆուտբոլիստներ-Մենք չենք հասկանում, թե ինչ ես դու մեզ ասում: Մենք այլևս քեզ չենք վստահում և ցանկանում ենք հայտնել մեր կարծիքը:
Սամպաուլի-Ինչի՞ մասին:
Ֆուտբոլիստներ-Ամեն ինչի:
Սամպաուլի-Հիմա ի՞նչ, դո՞ւք եք որոշելու կազմը, մարզվելու և անելու ամեն ինչ:
Լեոնել Մեսսի-Դու հազար անգամ հարցրել ես ինձ, թե ում եմ ուզում տեսնել կազմում, ում՝ ոչ: Ես երբեք որևէ անուն չեմ նշել: Ասա՛ բոլորի մոտ, որ ես անուն չեմ նշել:
Այս խոսակցությունից հետո Արգենտինայի ֆուտբոլի ֆեդերացիայի նախագահ Կլաուդիո Տապիան, ով ներկա է եղել միջադեպին, խորհուրդ է տվել մարզչին վայր դնել զենքերը: