Ամերիկայի Լաս Վեգաս քաղաքում տաքսու վարորդը վերադարձրել է մեքենայում մոռացված 300 հազ. դոլարը, որն ուղևորը շահել էր խաղատանը, հայտնում է РИА Новости-ն՝ վկայակոչելով Las Vegas Sun պարբերականին։
Ջերարդո Գամբոա անունով տաքսիստն իր մեքենայի ետևի նստատեղին նկատել է փողերով լի փաթեթը, երբ իջեցրել է ուղևորին և տեղափոխել մյուսին։ «Դուք իմ վկան եք»,- ասել է վարորդը նոր ուղևորին և հայտնել իր ղեկավարությանը։
Ուղևորի անձը պարզելուց հետո ոստիկանությունը վերադարձրել է գումարը։
Yellow Checker Star տրանսպորտային ընկերությունը Գամբոային շնորհել է «Տարվա վարորդ» կոչումը և պարգևատրել 1.000 դոլարով։ Պարբերականի տվյալներով՝ վարորդը դեռ պարգևատրում չի ստացել ուղևորից։
«Եթե նա ինձ ոչինչ չվճարի, դա նորմալ է։ Ես պարզապես ցանկանում էի բարի գործ կատարել»,- ասել է Գամբոան։
