Նոր իշխանությունների գործողությունները վստահություն չեն ներշնչում։ Եթե շարունակեն նույն ոգով, երրորդ մայդանը կլինի, հեռուստաալիքներից մեկի եթերում հայտարարել է Ուկրաինայի նախագահի թեկնածու Անատոլի Գրիցենկոն, տեղեկացնում է ՈՒՆՆ-ն՝ վկայակոչելով քաղաքական գործչի մամուլի ծառայությունը։
«Առանց իշխանությունների հանդեպ վստահության անհնար է հաղթահարել տնտեսական ճգնաժամը եւ երկիրը պաշտպանել սահմանին կանգնած ագրեսորից», - վստահ է Գրիցենկոն։
Քաղաքական գործիչը նշում է, որ որոշակի պաշտոնների բաշխումը շատ հարցեր եւ անվստահություն է հարուցում։ «Օրինակ, Լուգանսկի նահանգապետ Միխայիլ Բոլոտսկիխը այն մարդն է, որը վերացնում էր Մայդանը։ Բայց Տուրչինովի հրամանով նա նշանակվել է իր պաշտոնում»։
Գրիցենկոն վստահ է՝ եթե գործող իշխանությունը կշարունակի նույն ուղղությամբ, երրորդ մայդան կլինի։
«Իշխանությունների հանդեպ վստահությունը խիստ անհրաժեշտ է եւ դրա համար պայքարել է պետք։ Բայց երբ տեսնում եմ, որ արտասահմանում պատժամիջոցներ են կիրառվում Մեդվեդչուկի բիզնեսի դեմ, իսկ Ուկրաինայում՝ ոչ, ապա մոտս իշխանություններին ուղղված հարցեր են առաջանում», - նշում է Գրիցենկոն։