Վրաստանի ներքին գործերի նախարար Ալեքսանդր Չիկաիձեն վստահեցնում է, որ «որոշակի ուժեր շուտով կփորձեն ապակայունացնել իրավիճակը երկրում՝ իշխանափոխության նպատակով», գրում է ИТАР-ТАСС-ը։ Այդ մասին նա ասել է «Փրայմ թայմ» վրացական թերթին տված հարցազրույցում։
Նրա խոսքով՝ վերջերս Վրաստանի նախկին նախագահ Միխեիլ Սաակաշվիլին «հնչեցրել է երկրում տեղական «Եվրամայդան» կազմակերպելու գաղափարը»։ «Մենք տեղեկություն ունենք այն մասին, որ այդ գաղափարը քննարկվում է նաև նախկին իշխող «Միացյալ ազգային շարժում» կուսակցության ներսում»,- նշել է Չիկաիձեն։
Նախարարը նշել է, որ Վրաստանում որոշակի ուժեր, մի շարք տեղական ոչ կառավարական կազմակերպությունների աջակցությամբ, կփորձեն մարդկանց դուրս բերել փողոց, քաոս ստեղծել, իսկ այնուհետ մտադիր են կրակել այդ մասնակիցների վրա և հետագայում դրանում մեղադրել իշխանություններին։
Չիկաիձեն հայտարարել է, որ նրանք «արդեն Վրաստան են բերել ուկրաինական «Եվրամայդանի» ակտիվիստների, այդ ուժերը թրեյնինգներ են անցկացնում և պատրաստվում իրենց պլանների իրագործմանը»։
«Կան տեղեկություններ, որ այդ գաղափարի կողմնակիցներն արդեն անիվներ են գնել, որոնք պետք է այրեն ակցիայի ժամանակ։ Սակայն Վրաստանի իշխանությունները և հասարակությունը թույլ չեն տա երկրում իրավիճակի ապակայունացում, կձեռնարկվեն բոլոր օրենքով նախատեսված միջոցառումները՝ անկարգությունները կանխելու համար»,- վստահեցրել է նախարարը։