Կանադայի վարչապետ Սթիվեն Հարփերը խոստացել է, որ իր երկիրը նոր պատժամիջոցներ կկիրառի Ռուսաստանի դեմ՝ Ուկրաինայի արևելքում անկարգություններ հրահրելու համար:
Ըստ նրա՝ ներկայումս խաղաղությունն ու կայունությունը առավել մեծ սպառնալիքի տակ են, քան «սառը պատերազմին» հաջորդած որևէ այլ ժամանակահատվածում, հայտնում է ՈՒՆԻԱՆ-ը՝ վկայակոչելով «Ազատություն» ռադիոն:
Կանադան կդիմի հավելյալ քայլերի՝ Ռուսաստանին քաղաքականապես և տնտեսապես էլ ավելի մեկուսացնելու համար, հայտնել է Հարփերը:
Կանադայի արտգործնախարար Ջոն Բրեդն էլ իր հերթին ռուսամետ մարտիկներին անվանել է ավազակներ, որոնք Ուկրաինա են մտել ռուսական սահմանից:
Ըստ նրա՝ տագնապալի զուգահեռներ կան Արևելյան Ուկրաինայի և Ղրիմի բռնակցումից առաջ կատարված դեպքերի միջև:
Նախարարը հայտնել է, որ հաջորդ շաբաթ կայցելի Չեխիա, Սլովակիա, Լեհաստան, Լատվիա և Էստոնիա՝ քննարկելու Ուկրաինայում իրադրության սրացումը:
