ՆԱՏՕ-ի անդամ երկրները ռազմական միջոցառումների փաթեթ են համաձայնեցրել՝ Ուկրաինայի ճգնաժամին ի պատասխան, չորեքշաբթի հայտնել է ՆԱՏՕ-ի գլխավոր քարտուղար Անդերս Ֆոգ Ռասմուսենը, հաղորդում է interfax.ru-ն:
«Դա նշանակում է ավելի շատ ինքնաթիռներ օդում, ավելի շատ նավեր ջրում և ավելի շատ պատրաստվածություն ցամաքում»,- նշել է նա։
Գլխավոր քարտուղարի խոսքով՝ ինքնաթիռներն ավելի շատ թռիչքներ կիրականացնեն Բալթյան երկրների օդային տարածքում, ՆԱՏՕ-ի դաշնակիցների նավերը կտեղակայվեն Բալթիկ ծովում, ինչպես նաև Միջերկրական ծովի արևելքում:
Նա ընդգծել է, որ ընդունված միջոցառումները «վերաբերում են պաշտպանությանը և լիովին համապատասխանում են ՆԱՏՕ-ի միջազգային պարտավորություններին, որոնց թվում է դաշնակիցների պաշտպանությունը»։
