Ուկրաինայի նախագահի պաշտոնակատար, Գերագույն ռադայի խոսնակ Ալեքսանդր Տուրչինովը խոստովանել Է, որ իշխանությունը չի վերահսկում իրադրությունը Դոնեցկի մարզում: Այդ մասին նա հայտարարել Է մարզային պետական վարչակազմերի ներկայացուցիչների հետ անցկացված խորհրդակցության ժամանակ, հաղորդում Է «Ուկրինֆորմ»-ը:
«Գրավված են վարչական շենքերը Դոնեցկի մարզի շատ քաղաքներում և հենց Դոնեցկ քաղաքում: Այսօր այդ վայրում իշխանությունը չի վերահսկում իրադրությունը»,-ասել Է Տուրչինովը:
Ըստ ԻՏԱՌ-ՏԱՍՍ-ի՝ նա հայտնել Է, որ Ուկրաինայի զինված ուժերը բերված են լիակատար մարտական պատրաստության: Դա, ինչպես պնդում Է Ուկրաինայի նախագահի պաշտոնակատարը, կապված Է Ռուսաստանի կողմից սպառնալիքի հետ:
«Իշխանությունը չի վերահսկում իրադրությունը Դոնեցկում և մարզի տարածքում: Ցանկանում եմ ազնվորեն ասել, որ ուժային կառույցներն ի վիճակի չեն հսկողության տակ վերցնել իրադրությունը Դոնեցկի և Լուգանսկի մարզերում»,-հայտարարել Է Տուրչինովը: Ըստ նրա վարկածի, իրադրության ապակայունացման փորձեր են նկատվում նաև Խարկովի, Օդեսայի, Խերսոնի, Նիկոլաևսկի, Զապորոժսկի մարզերում: