Ֆուտզալի Հայաստանի ազգային հավաքականի գլխավոր մարզիչ Ռուբեն Նազարեթյանը ՀՖՖ պաշտոնական կայքի հետ զրույցում իր կարծիքն է հայտնել Աշխարհի 2020 թվականի առաջնության Եվրոպական գոտու ընտրական մրցաշարի որակավորման փուլի վիճակահանության վերաբերյալ.
«Նորմալ խումբ է: Ծանոթ ենք մեր մրցակիցներից երկուսին՝ Շվեդիայի և Մալթայի հավաքականներին, քանի որ խաղացել ենք նրանց դեմ: Շվեդներն ուժեղ հավաքական ունեն, և հիմա մեր առաջնային խնդիրը հենց նրանց դեմ խաղին պատրաստվելն է: Առաջին խաղից շատ բան կլինի կախված, և եթե կարողանանք հաջողության հասնել շվեդների դեմ խաղում, մեր խնդիրը կհեշտանա: Սա ասում եմ՝ հաշվի առնելով, որ խմբից երկու թիմ է դուրս գալիս: Բնականաբար, չենք թերագնահատում Մալթայի հավաքականին, իսկ բելգիացիները, ընդհանրապես, ինչպես և մեծ ֆուտբոլում, այստեղ ևս մեծ առաջընթաց են գրանցել և ուժեղ հավաքական ունեն: Անկախ ամեն ինչից՝ պատրաստվելու ենք լավագույն կերպով և ձգտելու ենք դուրս գալ խմբից»:
