Ադրբեջանում ԱՄՆ-ի դեսպան Ռիչարդ Մորնինգսթարը հայտարարել է, որ քաղաքական հասարակության վրա իշխանությունների գնալով մեծացող ճնշումների պատճառով Ուկրաինայի իրադարձությունները կարող են կրկնվել նաև այդտեղ:
«Եթե կառավարությունն ավելի կոշտ գիծ անցկացնի քաղաքացիական հասարակության նկատմամբ, ապա Մայդանի իրադարձությունները կարող են կրկնվել նաև Բաքվում: Եթե անգամ ոչ այժմ, ապա 5-10 տարի հետո: Եթե քաղաքացիական հասարակության հնարավորություններն ավելի շատ սահմանափակվեն և ոտնահարվեն, ապա դա կմեծացնի նման իրադարձությունների կրկնվելու ռիսկը», -ասել է Մորնինգսթարը:
Բաքվում ԱՄՆ դեսպանը նշել է, որ իրենք ուշադրությամբ հետևում են Ադրբեջանում տեղի ունեցող իրադարձություններին, հատկապես` քաղաքական ակտիվիստների ձերբակալություններին: Նա մեկ անգամ ևս հիշեցրել է, որ ԱՄՆ-ը սերտ հարաբերություններ են ստեղծում միայն ժողովրդավարական երկրների հետ:
Դեսպանի խոսքով` Ադրբեջանի կառավարությունը երբեմն ԱՄՆ-ի համար անհասկանալի քայլեր է կատարում: «Նրանք ասում են, որ հարկադրված են ճնշումներ գործադրել քաղաքացիական հասարակության վրա երկրում կայունություն ապահովելու համար: Բայց մենք այլ դիրքորոշում ունենք: Մենք գտնում ենք, որ ինչքան բաց լինի քաղաքացիական հասարակությունը, այնքան ամուր կլինի կայունությունը», -ասել է Բաքվում ԱՄՆ դեսպանը, ում լիազորություններն ավարտվում են երեք ամիս հետո:
