Մեկնարկեց ՀՀ սպորտի և երիտասարդության հարցերի նախարարության «Թրաֆիքինգի դեմ պայքար ուսանողական մրցադաշտում» թեմայով գիտելիքների ծրագիր-մրցախաղն՝ ուղղված երիտասարդների խոցելիության նվազմանը և մարդկանց թրաֆիքինգի ու շահագործման վտանգների մասին իրազեկվածության մակարդակի բարձրացմանը:
Ծրագրի նախատեղեկատվական փուլում, թեմայի վերաբերյալ դասախոսությամբ և փորձագիտական խորհրդատվությամբ հանդես եկան Հայ օգնության ֆոնդի «Երեխաների աջակցության կենտրոն» հիմնադրամի գործադիր տնօրեն, Հայաստանի սոցիալական աշխատողների ասոցիացիայի նախագահ, ԵՊՀ Սոցիալական աշխատանքի և սոցիալական տեխնոլոգիաների ամբիոնի դոցենտ, փորձագետ Միրա Անտոնյանը և Հայաստանի սոցիալական աշխատողների ասոցիացիայի վարչության անդամ, «Նագաշյան մանուկների տուն» երեխաների աջակցության կենտրոնի ծրագրերի ղեկավար, ԵՊՀ Սոցիալական աշխատանքի և սոցիալական տեխնոլոգիաների ամբիոնի դոցենտ, փորձագետ Նունե Գեղամյանը:
Փորձագետները մասնակիցներին ներկայացրեցին թե ինչպես են զոհերը գիտակցաբար համաձայնվում ստրկական աշխատանքին կամ իրենց օրգանների վաճառքին և թե ինչպես են երիտասարդները համարվում թրաֆիքինգի ռիսկային խումբ։ Խոսվեց նաև թրաֆիքինգի սխալ պատկերացումների մասին։
Նախապատրաստական փուլի ավարտին, մասնակիցներին, որպես լրացուցիչ ինֆորմացիայի հարթակ, ներկայացվեց antitrafficking.am կայքը և օգնության հեռախոսահամարները։
