Royal Dutch Shell էներգետիկ ընկերությունը հայտնել է աշխարհում ամենամեծ լողացող օբյեկտի շինարարության ավարտի մասին, որը նախատեսված է բնական գազի արդյունահանման ու փոխադրման համար: Այս մասին հայտնում է Associated Press-ը:
488 մետրանոց կոնստրուկցիան, որը ստացել է «Պրելյուդիա» (Նախերգանք) անվանումը, դուրս է եկել հարավկորեական կառամատույց, որտեղ էլ ստեղծվել է, և ուղևորվում է իր վերջնական նշանակետ՝ Ավստրալիայի արևմտյան ափ:
Օբյեկտը կլողա գազի հանքավայրերի վրայով, բնական գազ կհավաքի՝ օրական մոտ 110 հազար բարել, կսառեցնի այն մինչ հեղուկ վիճակի: Այդ վիճակով գազը կփոխադրվի Ասիա:
Նախագծի մասին հայտարարվել էր 4 տարի առաջ: Շինարարությունը սկսվել էր անցած տարի: Սպասվում է, որ գազի արդյունահանումը «Պրելյուդիայի» օգնությամբ կսկսվի 2017 թվականին:
